काठमाडौँ । नेकपा (माओवादी केन्द्र) भित्र अर्थमन्त्री जनार्दन शर्मालाई फिर्ता बोलाउने बारे छलफल भएको छ । खासगरी अर्थमन्त्री शर्माको काम कारवाहीलाई लिएर उनलाई फिर्ता बोलाउनेबारे पार्टीभित्र छलफल भएको बताइएको छ ।
अर्थमन्त्रीको गतिविधिबाट पार्टी नै नाङ्गिने अवस्था आएको भन्दै पार्टी अध्यक्षसँग अर्थमन्त्री शर्मालाई फिर्ता गर्नुपर्ने माग पार्टीभित्र उठेको बताइएको छ ।
सो सम्बन्धमा पार्टी अध्यक्ष पुष्पकमल दाहाल प्रचण्डले हिजो आइतबार अर्थमन्त्री शर्मालाई आफ्नो निवास खुमलटारमा बोलाएर छलफल गरेको समाचार छ । करिब दुई घण्टासम्म छलफल भएको भए पनि के विषयमा छलफल भएको भन्नेबारे खुलाइएको छैन ।
संकटमा परेको अर्थतन्त्रलाई उकास्ने गरी अर्थमन्त्री शर्माले कुनै कदम नचालेको भन्दै माओवादी केन्द्रभित्र उनको आलोचना भइरहेको छ । सत्ता गठबन्धनको प्रमुख घटक नेपाली कांग्रेसभित्र समेत शर्माको क्रियाकलापलाई लिएर आलोचना भइरहेको छ ।
बजेटको पूर्वसन्ध्यामा अर्थमन्त्रीलाई हटाउँदा नराम्रो सन्देश जाने भन्दै बजेट घोषणापछि उनलाई हटाउने योजनालाई पर सारिएको बताइएको छ ।
