काठमाडौँ । अमेरिकी सेनाको एसिया–प्रशान्त क्षेत्र प्रमुख जनरल चार्ल्स ए फ्लिनले प्रधानसेनापति प्रभुराम शर्मासँग द्विपक्षीय भेटवार्ता गर्नुभएको छ ।
प्रधान सेनापतिको कार्यकक्षमा भएको उक्त भेटघाटका क्रममा द्विपक्षिय हित तथा पारस्परिक सम्बन्धका विषयमा छलफल भएको सैनिक जनसम्पर्क निर्देशनालयले जनाएको छ ।
फ्लिनको सम्मानमा जङ्गी अड्डा परिसरमा नेपाली सेनाले सम्मान गारत अर्पण गर्नुका साथै नेपाली सेनाको अपरेशनल गतिविधिका बारेमा प्रस्तुतीकरण समेत गरिएको थियो ।
उच्चपदस्थ अधिकारीहरुबाट विगतमा भएका सदभावना भ्रमणको निरन्तरता स्वरुप रहेको यस ४ (चार) दिने औपचारिक भ्रमणको क्रममा जनरल चार्ल्स ए फ्लिन तथा भ्रमणदलका सदस्यहरुले हिमाल दृश्यावलोकनका लागि माउण्टेन फ्लाईटमा सहभागी हुनु भएको थियो ।
उहाँहरुले जेठ २९ गते पाँचखालस्थित नेपाली सेनाको श्री वीरेन्द्र शान्ति कार्य तालिम केन्द्र र शिवपुरीस्थित सैनिक कमाण्ड तथा स्टाफ कलेजको भ्रमण गर्ने कार्यक्रम रहेको निर्देशनालयले जनाएको छ ।
अमेरिकी सैन्य टोली आईतबार नै स्वदेश फर्कने कार्यक्रम रहेको छ । मित्रराष्ट्रका उच्चपदस्थ सैनिक अधिकारीहरुको यस किसिमको भ्रमणले दुई देशबीचको सैनिक सम्बन्धलाई थप प्रगाढ पारी आपसी सदभाव बढाउन मद्दत पुग्ने विश्वास नेपाली सेनाले लिएको छ ।
