काठमाडौँ । नेकपा (एकीकृत समाजवादी) को सचिवालय बैठकमा सो पार्टीबाट संघीय सरकारमा सहभागी भएका मन्त्रीहरु हेरफेर गर्नेबारे कुराकानी भएको छ । उपमहासचिव विजय पौडेलका अनुसार मन्त्रीहरु परिवर्तन गर्ने वा नगर्ने भन्ने निर्णय पार्टी अध्यक्ष माधवकुमार नेपालले शीर्ष नेताहरुसँग परामर्श गरेर गर्नेछन् ।
अहिले बहाल मन्त्रीहरुलाई सरकारमा पठाउँदा छ महिनाको समय दिइएको बताइएको छ । सचिवालय बैठकपछि पत्रकारहरुसँग कुराकानी गर्दै उपमहासचिव पौडेलले मन्त्रीहरुलाई पठाएको छ महिना व्यतित भइसकेकाले शीर्ष नेतासँग समझदारी गरेर उपयुक्त ठानेमा अध्यक्ष नेपालले उपयुक्त निर्णय लिनुहुने बताए ।
उनले पार्टीले मन्त्रीको हेरफेर गर्ने निर्णय गरे सबै मन्त्रीले मान्नुपर्ने बताए । यसलाई मन्त्रीहरुले स्वाभाविक मान्नुपर्ने उनको भनाइ थियो ।
