काठमाडौं । सुरक्षाको कारण देखाउँदै न्युजिल्यान्डले पाकिस्तानसँगको क्रिकेट सिरिज नखेल्ने घोषणा गरेको छ ।
तीन खेलको एकदिवसीय र पाँच खेलको टी–२० सिरिज खेल्न पाकिस्तानमा रहेको न्युजिल्यान्डले पहिलो एकदिवसीय खेल सुरु हुन केही घन्टाअघि सिरिज नखेल्ने भनेको हो ।
न्युजिल्यान्डको क्रिकेट बोर्डका अनुसार न्युजिल्यान्ड सरकारले सुरक्षा खतरा रहेको जानकारी दिएपछि सिरिज नखेल्ने निर्णय गरेको हो ।
न्युजिल्यान्डले शुक्रबार रावलपिन्डीमा पहिलो एकदिवसीय खेल खेल्दै थियो । तर टस गर्न ढिलाइ भएको थियो ।
त्यसपछि न्युजिाल्यन्ड क्रिकेटले विज्ञप्ति जारी गर्दै न्युजिल्यान्डले सिरिज नखेल्ने जनायो ।
अब न्युजिल्यान्ड क्रिकेट टिम पाकिस्तान छाडेर स्वदेश फर्कनेछ।
न्युजिल्यान्ड क्रिकेट टिम १८ वर्षपछि पाकिस्तान भ्रमणमा निस्किएको थियो ।
यता पाकिस्तान क्रिकेट बोर्डले भने न्युजिल्यान्डको यसप्रकारको निर्णयले क्रिकेटप्रेमीलाई दुःखी तुल्याउने उल्लेख गरेको छ ।
