काठमाडौं । नेकपा (एमाले)का उपाध्यक्ष तथा पूर्वअर्थमन्त्री विष्णुप्रसाद पौडेललाई सम्पत्ति शुद्धीकरणसम्बन्धी मुद्दामा म्याद थपका लागि विशेष अदालतमा उपस्थित गराइएको छ।
सोमबार सुर्खेतबाट पक्राउ परेका पौडेललाई मंगलबार काठमाडौं ल्याइएको थियो। उनलाई राति नै स्थलमार्गबाट काठमाडौं ल्याएर सम्पत्ति शुद्धीकरण अनुसन्धान विभागको नियन्त्रणमा राखिएको थियो।
विभागले सम्पत्ति शुद्धीकरणको कसुरमा अनुसन्धान अघि बढाउँदै म्याद थपको प्रक्रिया पूरा गर्न पौडेललाई विशेष अदालतमा उपस्थित गराएको जनाएको छ।
पौडेलमाथि सम्पत्ति शुद्धीकरणसम्बन्धी कसुरमा अनुसन्धान भइरहेको छ भने घटनाबारे थप अनुसन्धान जारी रहेको विभागले जनाएको छ।
