काठमाडौँ । काठमाडौँ महानगरपालिकाका मेयर बालेन्द्र साह (बालेन) सिसडोललाई एक साताभित्र दुर्गन्धमुक्त बनाउने प्रतिबद्धता व्यक्त गरेका छन् ।
काठमाडौँ महानगर उपप्रमुख सुनिता डंगोलसहित शुक्रबार बिहान काठमाडौँको फोहोर विसर्जन गर्ने नुवाकोटको सिसडोल पुगेर प्रमुख साहले एक साताभित्र केमिकल प्रयोग गरेर सो क्षेत्रलाई दुर्गन्धमुक्त बनाउने प्रतिबद्धता व्यक्त गरेका हुन् ।
“एक सातामा गन्ध नआउने गरी केमिकलको व्यवस्था गरिन्छ । मल र ग्यास पनि बनाइन्छ । त्यसका लागि तीन महिना लाग्छ । केमिकल हालिसकेपछि एक हप्ताभित्र गन्ध हटाइन्छ”, उनले भने ।
बन्चरेडाडाँको पनि रिपोर्ट हेरिएको भन्दै उनले सड्ने र नसड्ने फोहोर छुट्टयाएर मल र ग्यास निकाल्ने बताए । प्रमुख साहका अनुसार यसका लागि सड्ने र नसड्ने फोहोर छुट्टयाउनका लागि काठमाडौँ महानगरपालिकाले घरघरमा जनचेतना फैल्याउने काम गर्नेछ ।
विज्ञहरुसँग आफूले यसका लागि छलफल गरिसकेको उल्लेख गर्दै तीन महिनाभित्र मल र ग्यास दुवै निकाल्ने र सिसडोल तथा बन्चरेडाँडाको फोहोर व्यवस्थापन गर्ने बताए ।
सबै काम पूरा गर्न केही समय लाग्ने भएकाले काठमाडौँमा जम्मा भएको फोहोरको व्यवस्थापनमा अवरोध नगर्न उनले स्थानीयवासीलाई आग्रह गरे । उनले स्थानीयवासीको सबै समस्या समाधान गर्ने भन्दै तर फोहोर विसर्जन गर्न स्थानीयवासीले अवरोध गर्न नहुने बताए ।
