काठमाडौँ । काठमाडौँ महानगरपालिकाका नवनिर्वाचित प्रमुख बालेन्द्र साह (बालेन) ले नगरसभाको बैठक लाइभ गर्ने निर्णय गरेका छन् । महानगरपालिकाको निर्वाचनका बेला आफू विजयी भए नगरसभाको बैठक लाइभ गर्ने बताउँदै आएका साहले पद तथा गोपनीयताको सपथ लिएलगत्तै बसेको पहिलो बैठकमा आफ्नो प्रतिबद्धताअनुरुप पहिलो बैठक नै लाइभ गर्ने निर्णय गरेका छन् ।
नगरसभाको पहिलो बैठक आजै ४ बजेका लागि बोलाइएको छ । सो बैठक लाइभ हुने उनले बताए । प्रमुख साहले काठमाडौँ महानगरको फोहोर व्यवस्थापन आफ्नो पहिलो प्राथमिकतामा रहेको बताए । महानगरबासीले गरेको पापको भोगी सिसडोलबासी भएको भन्दै उनले भने, “हाम्रो फोहोरले गर्दा सिसडोलवासी क्यान्सरपीडित हुनुभएको छ, छालाको रोग भएको छ । त्यत्रो मान्छे मरिरहनु भएको छ । यो शोक मनाउने बेला हो ।”
फोहोर व्यवस्थापन नभएसम्म, सिसडोलबासीलाई स्वच्छ वातावरणमा बस्ने वातावरण नभएसम्म र उनीहरुले बाँच्न पाउने अधिकार नभएसम्म आफूहरुले केही नगर्ने उनीहरुलाई भनेको साहले बताए ।
