एजेन्सी । काराबाओ कप (इएफएल) फुटबलको उपाधि लिभरपुलले जितेको छ ।
आइतबार राति भएको फाइनल खेलमा चेल्सीलाई पेनाल्टी सुटआउटमा ११-१० गोल अन्तरले हराउँदै लिभरपुल च्याम्पियन बनेको हो ।
वेम्बली स्टेडियममा निर्धारित ९० मिनेट र थप गरिएको अतिरिक्त समय गोलरहित बराबरी भएपछि खेलको छिनोफानो पेनाल्टीमा लागेको हो ।
पेनाल्टी अघि खेलको ६७ औं मिनेटमा लिभरपुलका माटिपले गोल गरेका थिए । तर, भीएआरले अफसाइड देखाएपछि उनको गोलले मान्यता पाएन ।
यस्तै, ७८ औं मिनेटमा चेल्सीका काइ हार्भटेजको गोल अफसाइड रह्यो ।
यस्तै खेलको अतिरिक्त समयमा चेल्सीका रोमेरो लुकाकुको गोल पनि भीएआरले अफसाइड देखाएको थियो । रोमाञ्चक बनेको खेलको अतिरिक्त समयमै हार्भटेजको अर्को गोल अफसाइड रह्यो ।
योसँगै लिभरपुलले कीर्तिमानी नवौं पटक काराबाओ कपको उपाधि जित्न सफल रह्यो ।
पछिल्लो पटक लिभरपुल २०११/१२ को सिजनमा च्याम्पियन बनेको थियो ।
