काठमाडौँ । पूर्वप्रधानमन्त्री तथा प्रमुख प्रतिपक्षी दल नेकपा (एमाले) का अध्यक्ष केपी शर्मा ओलीले नेपाल र भारतले गठन गरेको प्रबुद्ध व्यक्तिहरूको समूह (ईपीजी) ले बनाएको प्रतिवेदन बुझेर सदनलाई जानकारी गराउन आग्रह गरेका छन् ।
प्रतिनिधिसभामा सरकारले प्रस्तुत गरेको वार्षिक नीति तथा कार्यक्रममाथिको छलफलमा भाग लिँदै उनले प्रतिवेदन बुझेर त्यसका अन्तरवस्तु संसद्लाई जानकारी गराउन प्रधानमन्त्री शेरबहादुर देउवालाई आग्रह गरे ।
उनले भने, “नेपाल र भारतका दुई प्रधानमन्त्रीले औपचारिक वार्तामा बसेर गठन गरेको ईपीजी समूहले दुईपक्षीय सहमतिमा बनाएर दुई वर्षभन्दा बढी काम गरेर बनाएको रिपोर्ट बुझे बुझाएको छैन । के भनियो भने भारतले बुझेन । म प्रधानमन्त्रीज्यूलाई आग्रह गर्न चाहन्छु, एउटा प्रधानमन्त्रीले पहिले बुझ्नुपर्यो नि ? नेपालले किन बुझ्दैन ? प्रधानमन्त्रीज्यू ईपीजी प्रतिवेदन बुझेर सदनलाई जानकारी गराउनुस् ।”
सन् २०१९ मै तयार भएको ईपीजी प्रतिवेदन ओलीले स्वयं प्रधानमन्त्री हुँदा बुझेका थिएनन् ।
