काठमाडौं । रसुवाको भोटेकोशीमा आएको बाढीबाट प्रभावित नागरिकलाई मनोसामाजिक परामर्श उपलब्ध गराउन नेपाली कांग्रेसले जनशक्ति तयार गरेको छ ।
नेपाली कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानको आयोजनामा भदौ २४ गते पार्टी केन्द्रीय कार्यालय सानेपामा मनोसामाजिक परामर्शसम्बन्धी प्रशिक्षण सम्पन्न भएको हो । प्रशिक्षणमा विभिन्न क्षेत्रका ४६ जना सहभागी भएका थिए ।
प्रशिक्षणपछि सहभागीहरू भोटेकोशी बाढीका कारण विस्थापित परिवारहरू बसिरहेका आश्रयस्थलमा पुगेर मनोसामाजिक परामर्श प्रदान गर्ने कांग्रेसले जनाएको छ ।
प्रशिक्षणका क्रममा बाढी प्रभावितहरूले भोगिरहेका विभिन्न प्रकारका मानसिक तनाव तथा समस्याका विषयमा छलफल गरिएको थियो । विशेषगरी बालबालिका, गर्भवती महिला, अपाङ्गता भएका व्यक्ति तथा ज्येष्ठ नागरिक प्राकृतिक विपत्तिका कारण मानसिक रूपमा बढी प्रभावित र जोखिममा रहेको सहभागीहरूले बताएका थिए ।
प्रशिक्षणमा डा. प्रभाकर पोखरेल, डा. रविन बस्नेत तथा मनोविद् कपिल शर्मा, गृष्मा पनेरू र प्रकाश लामिछानेले सहजीकरण गरेका थिए ।
प्रेस विज्ञप्ति कांग्रेसका कार्यवाहक मुख्य सचिव कृष्णप्रसाद दुलालले जारी गरेका हुन् ।
