काठमाडौं । पूर्व सूचना तथा सञ्चार मन्त्री तथा नेकपा एमालेका सांसद गोकुलप्रसाद बास्कोटाले एमसीसीको सम्झौता नेपाली काँग्रेसका सभापति तथ प्रधानमन्त्री शेर बहादुर देउवा र नेकपा माओवादी केन्द्रका अध्यक्ष पुष्प कमल दहाल 'प्रचण्ड'ले गरेको बताएका छन् । मंगलबार प्रेस चौतारी कास्कीले आयोजना गरेको कार्यक्रममा बोल्दै एमसीसी सम्झौता बारेमा उनीहरुले प्रष्ट धारणा बनाउनु पर्ने पनि बताएका हुन् ।
बास्कोटाले एमालेको सरकार भएका बेला एमसीसीको फाइल तत्कालीन सभामुख कृष्ण बहादुर महरा र अग्नि सापकोटाले घर्रामा थन्काइदिएको आरोप पनि लगाए । उनले विदेशसँगको सम्बन्ध बिगार्न देउवा र प्रचण्ड विभिन्न खेल खेलेको आरोप लगाए ।
कार्यक्रममा बोल्दै बास्कोटाले सत्तारुढ दलसँग झण्डै दुई तिहाइको बहुमत रहेको र 'एमसीसी पास गर्दा भयो नि, किन रोकेको ? एमाले किन चाहियो ?’ भन्दै प्रश्न समेत गरेका थिए । त्यस्तै बास्कोटाले एमसीसी पास फेल गर्ने काम सत्ता पक्षको भएको र यसमा एमालेको कुनै भूमिका नरहेको पनि बताए ।
