काठमाडौं । स्थानीय निर्वाचनमा यस पटकको महानगर र उपमहानगरको मतपरिणामहरु रोचक बन्दै गएका छन् ।
पछिल्लो पटक देशको राजधानी काठमाडौंको मेयरमा युवा इन्जिनियर बालेन्द्र साहले अग्रता बनाइरहेका छन् । पछिल्लो मतविवरण अनुसार बालेन्द्रले ४१ हजार २७९ मत प्राप्त गरिसकेका छन् ।
उनलाई नेपाली कांग्रेसकी सिर्जना सिंह र नेकपा एमालेका उम्मेदवार केशव स्थापितले पछ्याइरहेका छन् । नेपाली कांग्रेसकी सिर्जना सिंहले हालसम्म २३ हजार ८५५ मत प्राप्त गरेकी छिन् ।
जुन बालेन्द्रको भन्दा १७ हजार ४२४ ले कम हो । त्यस्तै स्थापितले हालसम्म २३ हजार २४ मत प्राप्त गरेका छन् । हालसम्म १ लाख १६ हजार ८५५ मत गणना भईसकेको छ भने अब ७४ हजार ३०१ मत गणना हुन बाँकी छ ।
