काठमाडौं । आम निर्वाचन पर्यवेक्षण समिति (जियोक) ले निर्वाचनको प्रथम चरणमा मतदाताहरुको उपस्थिति उल्लेख्य र उत्साहजनक रहेको बताएको छ ।
शुक्रवार मध्यान्ह गरेको पत्रकार सम्मेलनमा काठमाडौं उपत्यकाका तीन जिल्ला काठमाडौं, भक्तपुर र ललितपुरका निर्वाचन पर्यवेक्षकहरुले शान्तिपूर्ण रुपमा चुनाव भइरहेको बताएका छन् । पत्रकार सम्मेलनमा बोल्दै पूर्व प्रधानन्यायाधीश एवं स्थानीय निर्वाचन २०७९ का पर्यवेक्षक कल्याण श्रेष्ठले शाीन्तपूर्ण रुपमा निर्वाचन भइरहेको बताउनु भयो ।
उहाँले राजनीतिक दलहरुले पनि संयमता अपनाएर निर्वाचनमा सहभागिता भएको र आम मतदाताहरुले पनि संयमता अपनाएको उल्लेख गर्नुभयो । उहाँले मतदानमा सहभागी हुनेमा ज्येष्ठ नागरिकहरु, महिलाहरु र अपाङ्गहरु पनि उल्लेख्य रहेको पाइएको बताउनु भयो । उहाँले अपाङग्हरुका लागि अपाङ्गमैत्री मतदान स्थल नभएकोले त्यसलाई आगामी दिनमा सुधार गर्नुपर्ने बताउनु भयो ।
उहाँले मतदाताहरुमध्येमा लगभग ८० प्रतिशत मतदाताले मतदाता परिचयपत्र लिएर मतदान गर्न आएको बताउनु भयो । पर्यवेक्षक श्रेष्ठले काठमाडौं जिल्लाका विभिन्न मतदान केन्द्रहरुको अवलोकन तथा निरीक्षण गर्नुभएको छ ।
पर्यवेक्षक श्रेष्ठले भन्नुभयो, ‘हामीले सामान्यतया शान्तिपूर्ण ढंगले भएको पायौँ । राजनीतिक दलहरुलेका त्यस्तो अराजक गतिविधि पाएनौँ। एकाध ठाउँमा केही ढिला भएको गुनासो बाहेक अन्य समस्या देखिएन । ज्येष्ठ नागरिकहरु, अपाङ्गहरु पनि उल्लेख्य रहेको पाइएको छ । साथै मतदान केन्द्र अपाङ्गमैत्री नभएको पाएँ । महिलाहरुको उपस्थिति पनि उल्लेख्य छ ।
सुरक्षाको वातावरण पनि राम्रो देखियो । हरेकलाई सोध्दा मतदाता परिचय पत्र लिएर नै ७० देखि ८० प्रतिशत मतदाताहरुले मतदाता परिचय पत्र लिएर उपस्थित भएको पाएँ । यो भनेको मतदान प्रक्रिया सरल तरिकाले भइरहेको छ । कुनै कुनै ठाउँमा सहायताको साथमा मतदान दिएको पायौँ । मतदान सफल ढंगले अघि बढेको छ । सन्तोषजनक छ ।’
त्यस्तै पूर्व प्रधान्यायाधीश तथा पर्यवेक्षक सुशीला कार्कीले भक्तपुरका विभिन्न ९ मतदान केन्द्रहरुको अवलोकन गर्नुभएको थियो । जसक्रममा मध्यान्ह १२ बजेसम्म अधिकांश स्थानमा महिला निर्वाचन अधिकृत पाइएको बताउनु भयो । त्यस्तै निर्वाचन भने शान्तरुपमा नै भइरहेको र मतदान केन्द्रमा व्यवस्थापकीय कुराहरुमा विशेष जोड दिएको पाइएको बताउनु भयो ।
पर्यवेक्षक कार्कीले भक्तपुरका केही स्थानमा उम्मेदवारहरुले मतदाताका लागि खानाको व्यवस्था आफ्नो घरमा गरेको पाइएको पनि बताउनु भयो । उहाँले मध्यान्हसम्म अधिकांश मतदान केन्द्रमा आधा भन्दा बढी मत खसिसकेको बताउनु भयो ।
पूर्व प्रधानन्यायाधीश कार्कीले भन्नुभयो, ‘आज हामीले ८ बजेदेखि मतदान निरीक्षण गरेका हौँ । मैले अधिकांश भक्तपुरका मतदान केन्द्रहरुमा अवलोकन गरेको थिएँ । ९ वटा विभिन्न स्थानमा अवलोकन ग¥यौं । अधिकांश स्थानमा पुरुष मात्रै मतदान अधिकृत देखियो । ब्यासीमा महिला अधिकृत सबै रहेको पायौँ । निर्वाचन सबै ठाउँमा शान्त देखिन्छ । बुथको भौतिक समस्या देखिन्छ । नत्र सबै स्थानमा शान्त छ । सीमाडोल गाबिसमा एकजना उम्मेदवारले बिरामीहरुलाई हाम्रो गाडीबाट स्वीकारेको देखियो । ११ र १२ बजेको बीचमा आधा मत खसेको देखिन्छ । सुरक्षाको व्यवस्था राम्रो छ । महिला पुरुषको लाइन राखेको छ ।
चाँगुनारायाणमा सधैँ झगडा हुने ठाउँ रहेछ, त्यहाँ १४ सय मतदाता तामाङ जातीको हुनुहुँदो रहेछ । हामी बस्दै गर्दा पनि झडप हुन लागेको स्थिति देखियो । खाने व्यवस्था उम्मेदवारले घर घरमा गरेको जानकारी पायौँ । सूर्यविनायक गापा ९ मा मान्छे उम्मेदवारहरुले ओसारेको देखियो त्यहाँ अन्य स्थानको भन्दा सानो मतपत्र रहेको जानकारी रहेको प्राप्त भएको छ ।’
त्यस्तै पर्यवेक्षक एवं पूर्व प्रमुख निर्वाचन आयुक्त भोजराज पोखरेलले निर्वाचनमा मतदाताको उपस्थिति उल्लेख्य रहेको बताउनु भयो । उहाँले जुनकुनै उमेर समूहका मानिसहरु पनि आफ्नो मताधिकारको प्रयोगका लागि आएकोले सहभागिता उत्साहपूर्ण रहेको बताउनु भयो । उहाँले कुनै पनि मतदान केन्द्रमा निर्वाचन सामग्रीहरु नपुगेको गुनासो नआएको र सुरक्षा व्यवस्था पनि राम्रो भएको पाइएको बताउनु भयो ।
उहाँले भन्नुभयो, ‘मैले आज बिहान ८ बजेदेखि अवलोकन गरेँ । सहभागिताको हिसावबाट उत्साहजनक छ । जुनसुकै उमेरका मानिसहरु आफ्नो मताधिकार प्रयोग गर्न आएका छन् । व्यवस्थापनको प्रक्रिया हेर्दा कतै कुनै सामानहरु पुगेनन् भन्ने छैन । व्यवस्थित तरिकाले मतदान गरेको पाएका छौँ । मतदानमा खटिएका कर्मचारीहरुको स्वभाव पनि राम्रो देखियो । सबै किसिमले हेर्दा व्यवस्थापनको कुरामा राम्रो देखियो । राजनीतिक फाँटमा पनि निर्वाचनको कुरालाई प्रभाव पार्ने किसिमको व्यवहार देखिएन । सुरक्षा चुस्त छ । निर्वाचनको व्यवस्थापकीय पक्षमा गुणात्मक सुधार छ ।’
पर्यवेक्षक पोखरेलले निर्वाचनको व्यवस्थापकीय पक्षमा गुणात्मक सुधार देखिएको बताउनु भयो । पर्यवेक्षकको रुपमा उहाँले ललितपुर जिल्लाका मतदान केन्द्रहरुको अवलोकन तथा निरीक्षण गर्नुभएको थियो ।
