काठमाडौं । विवेकशील साझा पार्टीले विराटनगर महानगरपालिकाको मेयरमा अमलेश कर्ण र भरतपुर महानगरपालिकाको मेयरमा प्रबिन काफ्लेलाई उम्मेदवार बनाउने भएको छ। त्यसैगरी भरतपुरको उपमेयरमा पुष्पा सापकोटालाई उम्मेदवार बनाउने भएको छ। आज बसेको केन्द्रीय कार्यसम्पादन समितिको बैठकले उम्मेदवारहरूबारे निर्णय गरेको प्रवक्ता शरदराज पाठकले जानकारी दिनुभयो ।
विराटनगरका मेयर उम्मेदवार कर्ण र भरतपुरकी उपमेयर उम्मेदवार सापकोटा पार्टीका केन्द्रीय सदस्य हुन्। भरतपुरका मेयर उम्मेदवार काफ्ले चितवनका पुर्व जिल्ला संयोजक हुन्।
कर्ण २०७४ को संघीय निर्वाचनमा मोरङ्ग क्षेत्र नम्बर ४ मा उम्मेदवार थिए। उनले जिल्लामा भ्रष्टाचारविरोधी अभियानको नेतृत्व गर्नुका साथै विभिन्न सामाजिक र खेलकुदसम्वद्ध संघसंस्था र अभियानहरूको अगुवाइ गरिसकेका छन्। उनले बीबीए अध्ययन पुरा गरेका छन्।
भरतपुरका मेयर उम्मेदवार २८ बर्षिय काफ्ले मेकानिकल इन्जिनियर हुन्। उनले ूतातोभात अभियानू का योजनाकारमध्येका एक हुन् जुन अभियान अन्तरगत भरतपुरमा कोभिड संक्रमित बिरामीका कुरुवाहरुलाई २८ दिनसम्म निरन्तर निस्शुल्क खाना खुवाइएको थियो।
त्यसैगरी भरतपुरकी उपमेयर उम्मेदवार सापकोटा महिला सशक्तिकरण, शिक्षा र स्वास्थ्य क्षेत्रमा विभिन्न अभियान सञ्चालन गर्नुका साथै त्यस सम्बन्धि कार्यक्रममा संलग्न हुँदै आएकी छन्। उनले स्वास्थ्य तथा जनसंख्यामा स्नातकोत्तर गरेकी छन्।
