काठमाडौं । नेकपा (एकीकृत समाजवादी)का सम्मानित नेता झलनाथ खनालले देशको संविधानको रक्षा गर्नु राजनीतिक पार्टीहरुको जिम्मेवारी भएको बताउनुभएको छ ।
बिहीवार काटमाडौंमा रिर्पोट्स क्लवको २४ औँ वार्षिकोत्सवको अवसरमा आयोजित कार्यक्रमलाई सम्बोधन गर्दै सम्मानित नेता खनालले देशको संविधानको रक्षा गर्नु सम्पूर्ण नेपाली र राजनीतिक दलहरुको दायित्व भएको बताउनुभएको हो । उहाँले लोकतान्त्रिक क्रान्ति सम्पन्न गरेर नयाँ संविधान निर्माण भएको उल्लेख गर्दै यो संविधान तुलनात्मक रुपमा राम्रो भएको बताउनुभयो ।
उहाँले भन्नुभयो – ‘हामीले दश वर्ष लगाएर नयाँ संविधान पनि निर्माण गरेका छौँ । यो एउटा राम्रो संविधान बनेको छ । यद्यपी संविधान कुनैपनि अन्तिम हुँदैनन् । यो पनि अन्तिम भन्नुपर्छ भन्ने मलाई लाग्दैन । तर सकेसम्म यसको लामो आयु होस् भनेर हामीले कामना गर्नुपर्छ । यो तुलनात्मक रुपले राम्रो संविधान हामीले बनाएका छौँ । स्वभाविक रुपले यो संविधानमार्फत् हामीले ०६२÷०६३ को जनक्रान्तिको उपलब्धीहरुलाई संस्थागत गरेका छौँ । त्यसैले यो संविधानको रक्षा हामी सम्पूर्ण २ करोड ९२ लाख नेपाली र उनका प्रतिनिधिहरुको रुपमा रहेका सम्पूर्ण राजनीतिक पार्टीहरुका निम्ति एउटा ठुलो जिम्मेवारीको विषय हो ।’
उहाँले आगामी निर्वाचनलाई शान्तिपूर्ण, निष्पक्ष र गुणस्तरीय ढंगले सम्पन्न गर्नुपर्नेमा जोड दिनुभयो ।
