काठमाडौँ । परराष्ट्रमन्त्री डा नारायण खड्काको निमन्त्रणामा तीन दिवसीय नेपाल भ्रमणका क्रममा स्टेट काउन्सिलर तथा जनवादी गणतन्त्र चीनका विदेशमन्त्री वाङ यीका कार्यक्रम यस्ता रहेका छन् ।
शनिबार उहाँले प्रधानमन्त्री निवास बालुवाटारमा प्रधानमन्त्री शेरबहादुर देउवासँग शिष्टाचार भेट गर्नुहुनेछ ।
त्यसपछि उहाँले आफ्ना नेपाली समकक्षी परराष्ट्रमन्त्री डा खड्कासँग आ–आफ्नो प्रतिनिधिमण्डलको नेतृत्व गर्दै द्विपक्षीय वार्ता गर्नुहुनेछ ।
आइतबार बिहान ९ः३० मा उहाँले राष्ट्रपति विद्यादेवी भण्डारीसमक्ष शिष्टाचार भेट गर्ने कार्यक्रम रहेको छ ।
सोही दिन बिहान ११ बजे विदेशमन्त्री यीले होटल मेरियटमा पूर्वप्रधानमन्त्री एवं नेकपा (एमाले)का अध्यक्ष केपी शर्मा ओलीसँग द्विपक्षीय भेट गर्नुहुनेछ । सो अवसरमा अध्यक्ष ओलीको टोलीमा उपाध्यक्षसहित सात सदस्य रहनुहुने बताइएको छ ।
सोही दिन उहाँले नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल प्रचण्डसँग पनि द्विपक्षीय भेट गर्नुहुनेछ ।
आइतबार बिहान उहाँ शिवपुरी हाइकिङ गर्नुहुनेछ । यसअघि पनि यीले नेपाल भ्रमणका क्रममा चन्द्रागिरिको हाइकिङ गर्नुभएको थियो ।
दिउँसो उहाँले पोखरा अन्तर्राष्ट्रिय विमानस्थलको भर्चुअल उद्घाटन गर्ने कार्यक्रम रहेको छ ।
नेपाल भ्रमणमा रहँदा उहाँ द्वारिका होटलमा बस्नुहुने जनाइएको छ ।
