इङलिस प्रिमियर लिग अन्तर्गत शनिबार राति भएका खेलमा म्यान्चेस्टर युनाइटेड र आर्सनल दुबैले नराम्रो हार व्यहोरेका छन् ।
म्यान्चेस्टर युनाइटेड वाटफोर्डसँग ४–१ गोल अन्तरले पराजित भएको छ भने लिभरपुलले आर्सनललाई ४–० गोल अन्तरले हरायो ।
यस सिजनको लिगमा ठीकै सुरुवात गरेको म्यान्चेस्टर युनाइटेड पछिल्ला केही खेलदेखि निरन्तर खस्केको छ । टिमले एकपछि अर्को पराजय व्यहोरेको छ । यो हारसँगै म्यान्चेस्टर लिगको अंक तालिकामा सातौं स्थानमा झरेको छ ।
युनाइटेडमाथि शुरु देखि नै दबाब बनाएर आक्रामक खेल खेलेको वाटफोर्टले पहिलो गोल २८ औं मिनेटमा गरेको थियो । टिमका लागि जोसुवा किङले गोल गरेका थिए । त्यसपछि पनि वाटफोर्ड रोकिएन ।
वाटफोर्डका लागि इस्माइला सारले ४४औं मिनेटमा गोल गरेका थिए भने खेलको अन्त्यतिर अतिरिक्त समयमा जोवा पेड्रो र इमानुएल डेनिसले एकएक गोल ठोके । युनाइटेडका लागि एक मात्र गोल डोनी भान बिकले ५०औं मिनेटमा गरेका थिए ।
निराश म्यान्चेस्टरका खेलाडी ह्यारी म्यागुएरले ६९ औं मिनेटमा रातो कार्ड पाएर मैदान छाडेका थिए ।
यो नतिजापछि पहिल्यै दबाबमा परेका म्यान्चेस्टर युनाइटेडका मुख्य प्रशिक्षक ओले गुनार सोल्जारको पद धरापमा परेको छ । यसअघि नै सोल्जारको विकल्पमा केही नामहरु बजारमा आइसकेका थिए, अब यस पराजयले कुनै पनि बेला सोल्जार बर्खास्त हुन सक्ने अड्कलबाजी शुरु भएको छ ।
लिभरपुलको शानदार विजय
लिभरपुलले आफ्नो गृह मैदान एन्फिल्डमा आर्सनलमाथि गोलको बर्षा गरेको छ । रेड डेभिल्सले गनर्समाथि ४–० गोल अन्तरले पराजित गरेको छ ।
लिभरपुलका लागि साडियो माने (३९), डिएगो जोटा (५२), मोहम्मद सलाह (७३) र टाकुमी मिनामिनो (७७) ले गोल गरेका थिए ।
यो जितसँगै लिभरपुलले १२ खेलबाट २५ अंक जोडेको छ र लिगको दोस्रो स्थानमा छ । समान १२ खेल खेलेको चेल्सीको २९ अंक छ ।
लेस्टरको पोस्टमा चेल्सीको तीन गोल
शनिबार नै भएको खेलमा लेस्टर सिटीमाथि चेल्सीले तीन गोल गरेको छ ।
लेस्टरको गृह मैदान किङ पावर स्टेडियममा भएको खेलमा शुरु देखि नै चेल्सीले लेस्टरमाथि दबाब बनाएको थियो ।
यो सिजन निकै फर्ममा रहेको चेल्सीका लागि एन्टोनियो रुडीगर र एन्गोलो कान्टेले पहिलो हाफमा सुन्दर दुई गोल गरेर टिमलाई २–० को अग्रता बनाएका थिए । रुडीगरले १४औं मिनेटमा हेड मार्फत गरेका थिए भने कान्टेले २८औं मिनेटमा डिबक्स बाहिरबाट प्रहार गरेको बल सुन्दर रुपमा गोलमा परिणत भएको थियो ।
तेस्रो गोल ७१ औं मिनेटमा क्रिस्टियन पुलिसिकले गरेका थिए । चेल्सीले प्रहार गरेका अरु दुई गोल अफसाइड घोषणा गरिएका थिए ।
लेस्टरका तर्फबाट केही राम्रा प्रहार भए पनि चेल्सीका गोलकिपरले सुन्दर बचाउ गरेका थिए ।
यो जितसँगै यस सिजनको लिगमा चेल्सी पहिलो स्थानमा कायमै छ । पछिल्लो अंक तालिकामा चेल्सीले १२ खेलबाट २९ अंक बनाएको छ भने एक खेल कम खेलेको म्यान्चेस्टर सिटीको ११ खेलबाट २३ अंक छ ।
