काठमाडौं । नेकपा एमालेका अध्यक्ष एवम् पूर्वप्रधानमन्त्री केपी शर्मा ओलीले नेपाल सबै प्रकारका खेलकुद क्षेत्रको विकासका लागि अनुकूल भूगोल भएको मुलुक भएको बताउनु भएको छ ।
अध्यक्ष ओलीले भूगोल, प्रकृति अनुकूल भएकाले नेपालले खेलकुद क्षेत्रको विकासमा पछि पर्नुपर्ने कुनै कारण नरहेको बताउनु भएको हो । पार्टी निकट नेपाल खेलकुद महासंघले आईतबार काठमाडौंमा आयोजना गरेको ‘खेल नीति सम्मेलन’ मा बोल्दै उहाँले खेलाडीहरुलाई उत्कृष्ट प्रर्दशनका लागि अधिकतम अभ्यास गर्न पनि आग्रह गर्नु भयो ।
अध्यक्ष ओलीले नेकपा एमालेले लिएको खेलकुद नीति सही, व्यवहारिक र उन्नतस्तरको हुनुपर्ने बताउनु भयो । एमालेले बनाउने हरेक नीतिमा सावधानी अपनाउनुपर्ने उहाँले बताउनु भयो । अध्यक्ष ओलीले एमालेले हरेक क्षेत्रको विकासका लागि सही नीति लिएको दावी समेत गर्नु भयो । उहाँले नीति सही भएपनि त्यसको कार्यान्वयन नहुँदा ‘पुस्तकमा भएको विद्या र अर्काको हातमा भएको धन परेको बेला काम लाग्दैन’ भन्ने संस्कृतिको उखान जस्तो हुन पुग्नेतर्फ पनि सचेत गराउनु भयो ।
अध्यक्ष ओलीले खेलका तरीका र शिक्षाहरुलाई पनि अभ्यासमा लगिएन भने काम नलाग्ने भन्दै खेलाडीहरुलाई अभ्यास खेलमा ध्यान दिन आग्रह गर्नु भयो । उहाँले भन्नु भयो, ‘खेलको सम्बन्धमा हाम्रो भूगोल, हाम्रो प्रकृति खेलका लागि, सबै प्रकारणका खेलका लागि इन्डोर्स गेम, आउटडोर्स गेम अथवा अरु एडमेन्चर गेमहरु, अलिक जोखिमयुक्त देखिने खालका गेमहरु, यस्ता बलले खेलिने गेमहरु, यी सबै गेमहरुमा हामी पछाडि पर्नुपर्ने कुनै कारण छैन । हामी सही नीतिहरु तय गर्दछौं । ती अनच्यालेन्जएवल हुन्छन । किनभने ती करेन्ट हुन्छन । ती हितकारी हुन्छन, लाभकारी हुन्छन । त्यसकारण हामीले नीति निर्माण गर्दा सावधानी पनि अपनाउनु पर्छ– गल्ती नहोस् । किन, हाम्रा नीति र हाम्रा नीतिको कार्यान्वयनले यदि गलत नीति तय भए वा त्यसको कार्यान्वयनमा गल्ती भए देशले नै गल्ती गर्न पुग्दछ । हाम्रा नीति सही, व्यवहारिक र उन्नत स्तरको हुनु पर्दछ । र त्यसको कार्यान्वयन अथवा ती नीतिहरुको कार्यान्वयन सक्रियताका साथ गर्नु पर्दछ । नीति बनायौं तर सफल कार्यान्वयन गरेनौं भने, नीति कार्यान्वयनमा सुस्तता देखायौं भने ती नीतिहरु संस्कृतमा एउटा भन्छ–पुस्तकमा भएको विद्या र अर्काको हातमा भएको धन परेको बेलामा काम लाग्दैन भनेर । त्यस्तै हुन्छ ।’
अध्यक्ष ओलीले खेलकुद क्षेत्रका विज्ञहरुसँग परामर्श गरेर खेलकुद क्षेत्रको विकासमा केन्द्रित हुन पनि महासंघका पदाधिकारीहरुलाई निर्देशन दिनु भयो । उहाँले खेलाडीहरुको मनोबल बढाउन पनि खेलकुद क्षेत्रका दर्शकहरुको संख्या बढाउन जोड दिनुपर्ने बताउनु भयो ।
