चितवन । नेकपा एमालेको १०औँ राष्ट्रिय महाधिवेशनमा पार्टीको नेतृत्व छनौट पेचिलो बन्दै गएको छ । पार्टी अध्यक्षमा केपी शर्मा ओलीकै निरन्तरता हुने लगभग निश्चित छ । तर अध्यक्ष ओली पछिको वरिष्ठ उपाध्यक्ष पदमा कसलाई ल्याउने भन्नेमा ओली स्वयं अध्ययन र अन्य नेताहरुसँग परामर्श गरिरहनु भएको छ । वरिष्ठ उपाध्यक्षको दौडमा मुख्य रुपमा सुवास नेम्बाङ र ईश्वर पोखरेल रहनु भएको छ ।
अध्यक्ष ओलीले नेम्बाङलाई “ग्रिन सिग्नल” दिनु भएकाले उहाँ नै वरिष्ठ उपाध्यक्ष हुने स्रोतले जनायो । उपाध्यक्ष, महासचिव, उपमहासचिव र सचिवमा धेरै नेता आकाँक्षी हुँदा अध्यक्ष ओलीलाई नेताहरु व्यवस्थापन गर्न कठिनाई भएको छ ।
काठमाडौंमा रहँदा र चितवन पुगेपछि पनि अध्यक्ष ओलीले स्थायी समितिका सदस्य तथा केही केन्द्रीय सदस्यहरुसँग परामर्श गर्नु भएको छ । उहाँले ईश्वर पोखरेल सहित नेकपा माओवादी छाडेर एमाले प्रवेश गर्नु भएका रामबहादुर थापा, नेत्री अष्टलक्ष्मी शाक्य सहितका नेताहरुलाई उपाध्यक्ष बनाउने तयारी गर्नु भएको बुझिएको छ । यसैगरी महासचिवमा विष्णु पौडेललाई अघि बढाउने र शंकर पोखरेललाई अन्य पदमा व्यवस्थापन गर्ने तयारी ओलीेको रहेको उहाँ निकट स्रोतले जानकारी दियो ।
एमालेका औपचारिक रुपमा उम्मेदवारहरुको समूह नबने पनि स्थायी समितिमा दुई पोखरेल एउटा कित्तामा र अरु सदस्य पौडेलको पक्षमा देखिएको पनि स्रोतले जानकारी दियो ।
यता पूर्व माओवादी तथा हाल एमालेका नेताहरु रामबहादुर थापा, लेखराज भट्ट भने अध्यक्ष ओलीको ईशारा कुरेर बसिरहनु भएको छ । ओलीले निर्णय बिरुद्ध कोही नेता पनि जान नसक्ने हुनाले यस पटक ओलीले जे चाहानु हुन्छ लगभग नेतृत्व त्यही अनुसारको आउने निश्चित नै छ ।
युवा फाँटका ईञ्चार्ज महेश बस्नेत र विद्यार्थी फाँटका ईञ्चार्ज खिमलाल भट्टराई पनि नेम्बाङ र पौडेलका पक्षमा उभिएका छन् । आफूभन्दा जुनियरलाई महासचिवको जिम्मेवारी दिए आफूहरु पनि प्रतिस्पर्धी रहने भन्दै अध्यक्ष ओलीलाई सचिव प्रदीप ज्ञावली र पृथ्वी सुब्बा गुरुङले धारणा सुनाएपछि ओली अप्ठ्यारोमा पर्नु भएको छ । यसैगरी सबैभन्दा बढी व्यवस्थापन सचिवमा गर्नुपर्ने अवस्था रहेको छ । बिगतमा जिम्मेवारी लिएका नेता तथा नयाँको दाबी पनि धेरैको सचिवमा रहेको छ ।
नेतृत्वमा मिलाउन १० बुँदे सहमति सहित एमालेमा रहेका नेता सँगै पूर्व माओवादीका नेताहरुलाई व्यवस्थापन गर्नु पनि निकै कठिन भएको ओली निकट स्रोतले जनायो ।
