काठमाडौं । नेपाली कांग्रेसका सभापति शेरबहादुर देउवाले नेकपा नेतृत्वको सरकारले कर्मचारीलाई पार्टीको नियन्त्रणमा राख्न खोजेको आरोप लगाएका छन् ।
मेलमिलाप दिवसको अवसरमा आज नेपाली कांग्रेसले गरेको कार्यक्रममा बोल्दै सभापति देउवाले कर्मचारीमाथि नियन्त्रण गरेर देश चलाउनु सरकार अधिनायकवाद तिर लागेको भान हुने बताएका छन् । उनले सरकार तानाशाही तिर जान खेजेको भन्दै चिन्ता समेत ब्यक्त गरेका हुन् ।
त्यसैगरी उनले पुलिस र सेनामा हस्तक्षेप नेकपाले गरेको र न्युट्रल ब्युराक्रेसी कायम गर्न नसकेको आरोप लगाएका हुन् । उनले यसरी सबै कर्मचारी माथि हस्तक्षेप गर्नु अधिनायकवादी सोचको सुरुवात भएको जनाएका छन् ।
हालको केपि सरकारले लोकतन्त्रविरोधी काम गरिरहेको भन्दै देउवाले आफूहरु अहिले पनि मेलमिलापको पक्षमा रहेको बताए । ‘मेलमिलाप नीतिमा कांग्रेस हिजो पनि थियो, आज पनि छ र भोलि पनि रहन्छ’ उनले भने ‘हामी मेलमिलाप चाहन्छौं । तर सरकार तानाशाही व्यवहार देखाउँदैछ ।’
महासमिति बैठकले पारित गरेको नयाँ विधानअनुसार नेपाली कांग्रेस पूर्ण समावेशी पार्टी बनेको बताउँदै उनले अब महिला, दलित, आदिबासी लगायत उत्पीडित क्षेत्रको सदस्यता बढाउनुपर्ने बताए ।
