काठमाडौँ । नेपाली युवा लेग स्पिनर सन्दीप लामिछाने अष्ट्रेलियाको प्रतिष्ठित बिग ब्यास लिगको चौथो खेलमा पनि विकेट लिएका छन्।
मंगलबार मेल्वर्न रेनेगड्स विरूद्धको खेलमा सन्दीपले ४ ओभरमा ३१ रन खर्चिदै १ विकेट लिएका हुन । टम कुपरलाई गुगलीमा आउट पार्दै आफ्नो दोस्रो ओभरको अन्तिम बलमा विकेट लिएका हुन।
आज निकै नै खर्चिला बनेका सन्दीपले खेलमा खासै कमाल देखाउन नसकेपनि उनले जारी लिगमा चार खेलबाट ८ विकेट लिएका छन् । तीमध्ये मेल्वर्न स्टार्सले दुई खेलमा हार र एक खेलमा जित निकालेको छ तर सन्दीपले भने तीनै खेलमा बलिङको जादु देखाएका छन्।
सन्दीपले पहिलो खेलमा सिड्नी थन्डर्सका दुई विकेट हात पारे। होर्वाट हुरिकेन्सविरुद्ध दोस्रो खेलमा उनले तीन विकेट लिए। तेस्रो खेलमा सिड्नी सिक्सर्सविरुद्ध दुई विकेट लिएका सन्दीप जारी प्रतियोगितामा अहिलेसम्मका सर्वाधिक विकेट लिने खेलाडीको तेस्रो नम्बरमा छन्।
पछिल्ला तिनै खेलमा सन्दीपको अर्को एउटा संयोग
सबै खेलमा पुरै ओभर बलिङ गरेका सन्दीपले तिनै टिमका कप्तानलाई पेवेलियन फर्काइदिएका छन्। जुन एउटा अनौठो संयोग पनि हो।
क्यानबेरामा सम्पन्न पहिलो खेलमा सन्दीपले सिड्नी थन्डर्सका कप्तान शेन वाट्सनलाई आउट पारे भने दोस्रो खेलमा भने होर्वाट हुरिकेन्सका कप्तान म्याथ्यू वेडलाई क्याच आउट गरेका थिए। सन्दीपले तेस्रो तथा विजयी खेलमा सिड्नी सिक्सर्सका कप्तान मोजेज हेनिरिक्सलाई एलबिडब्लु धरापमा पार्दै पेवेलियन पठाएका थिए।
राउण्ड रोबिन र नकआउट चरणमा हुने प्रतियोगिताको पछिल्लो संस्करण एडिलेड स्ट्राइकरले जितेको थियो। आठ टोलीका अंक तालिकामा सन्दीपको टोली एक जितका साथ चौथो नम्बरमा उक्लिएको छ।
