नुवाकोट। मुआब्जाको माग गर्दै गल्छी–त्रिशूली–मैलुङ्ग–स्याफ्रुबेसी–रसुवागढी सडक योजनाअन्तर्गत प्रभावित क्षेत्रका बासिन्दाले आज नुवाकोट बन्द आह्वान गरेका छन् । बन्दका कारण नुवाकोट सदरमुकाम आउने र रसुवा जाने यातायातको साधन ठप्प भएको छ ।
बिहानदेखी बन्द कर्ताले चाचेक चोकमा टायर बल्नुका साथै यातायात चलाउन ठप्प पारेपछि ढुंगेबजार, विदुर, बट्टार, गंगटे बजार ठप्प भएको छ ।
बन्दका कारण शैक्षिकसस्था,बजार कलकारखाना लगाएतका क्षेत्रहरु बढि प्रभावित भएका छन् ।
सरकारले सडकका दायाँबायाँ पर्ने जग्गको मुआब्जा नदिएसम्म आन्दोलन जारी राख्ने समितिका संयोजक लीलानाथ न्यौपानेले बताए । विदुर नगरपालिका १, २, ४ र ५ वडावासीले सरकारसँग मुआब्जा माग गर्दै आएका छन् । पछिल्लो समय पृथ्वीराजमार्गको धादिङ गल्छी हुँदै त्रिशूली–मैलुङ–स्याफ्रुबेसी–रसुवागढी आयोजनाले मुआब्जा नदिएको उनीहरूको आरोप छ ।
उक्त सडक खण्डमा २०३४ सालको राजपत्रमा काठमाडौँ(त्रिशूली सहायक मार्ग तोकिएको र तत्कालीन अवस्थामा सडकले दायाँबायाँ चर्चेको जग्गा सरकारको नाममा जाने भन्ने व्यवस्थाका कारण मुआब्जा दिन नमिल्ने भनेर आयोजना पन्छिएको छ ।
मुआब्जाको लागि आयोजना, स्थानीय प्रशासन र प्रधानमन्त्री कार्यालय समक्ष भन्दा पनि कतैबाट सुनुवाइ नभएपछि बाध्य भएर जिल्ला बन्द गर्नुपरेको आयोजकले जनाएको छ ।
