काठमाडौँ । काठमाडौँको हनुमानढोकामा रहेको बसन्तपुरमा होलीको चीर ठड्याइएको छ ।
बसन्तपुरमा बिहीबार बिहान ११ बजेर ५५ मिनेटको साइतमा बसन्तपुरमा रहेको हनुमानढोका दरबारको दक्षिण पटाङगिनी, ऐतिकासिक मोहनकाजी चोक तथा दाखचोकमा ३२ फुट उचाइको तीन खण्डे गजुर जस्तो देखिने रंगीविरङगी तीनखण्डे होलीचीर ठड्याइएको हो ।
प्रत्येक वर्ष फागुन शुक्ल अष्टमीका दिन रंगीविरङगी कपडाका ध्वजापताकासहित सजाइएको बाँसको तीन खण्डे चीर ठड्याएपछि मुलुकभर होली प्रारम्भ भएको मानिन्छ ।
चीर ठड्याएसँगै राजधानी लगायत देशभर औपचारिक रुपमा होली पर्व सुरु भएको मानिन्छ । होली पर्वलाई बसन्त ऋतुको आगमनको खुशीयालीमा रंगसहित मनाउने पर्वको रुपमा लिने गरिएको छ । अन्य समयमा रंगहरुसँग खेल्न कानुनी रुपमै प्रतिबन्ध लगाइएको भएपनि यो पर्वमा कुनै रोकतोक छैन् ।
होली पर्वको शुभारम्भ भएको जनाऊ दिन बसन्तपुरमा चीर ठड्याउने गरिएको ‘धालासिक्व मानन्धर सनाः गू खलः’ का सचिव मदनरत्न मानन्धरले जानकारी दिए ।
चीर ठड्याइसकेपछि गुर्जुको पल्टनबाट हर्ष बढाई गरिएको थियो । स्थानिय गोपि खड्कीका अनुसार होली पर्व भगवान कृष्णले गोपीनीहरु नुहाउन गएका बेला उनीहरुको कपडा हरण गरी रुखमा झुण्डयाएकाले सोही स्मरणको रुपमा पनि मनाउने गरिएको जनविश्वास रहिआएको बताए ।
काठमाडौँ लगायत पहाडी जिल्लाहरुमा चैत्र ६ गते बुधबार र तराई मधेसका जिल्लाहरुमा चैत्र ७ गते बिहीबार होली पर्व परेको छ । होलीमा सरकारले सार्वजनिक बिदासमेत दिने गर्दछ ।
