काठमाडौं । फुटबल जगतमा अर्जेन्टिनाका स्टार खेलाडी लियोनल मेस्सी र पोर्चुगिज स्टार खेलाडी क्रिस्टियानो रोनाल्डोमध्ये को उत्कृष्ट भन्ने चर्चा सँधै हुने गरेको छ ।
मेस्सी लामो समयदेखि स्पेनिस क्लब बार्सिलोनाबाट व्यवसायिक फुटबल खेलिरहेका छन् भने रोनाल्डोले इटायिलन क्लब युभेन्टसबाट खेलिरहेका छन् । दुवै पाँच–पाँच पटकका बालोन डी’ओरका विजेतासमेत हुन् ।
यी दुईबीच को उत्कृष्ट भन्ने चर्चा भने सँधै नै चलिआएको छ । खेलाडीदेखि लिएर प्रशिक्षकसम्म र समीक्षकदेखि लिएर विश्लेषकसँम्म सबैले यी दुईमध्ये को उत्कृष्ट भन्ने विषयमा आफ्नो मत सार्वजनिक गर्दछन् ।
यस सिजन मेस्सीले रोनाल्डोभन्दा आफु उत्कृष्ट भएको संकेत गरेका छन् ।दुवै खेलाडीले यस सिजन आफ्नो क्लबलाई लिग जिताए । तर, धेरै गोल गर्नेमा मेस्सी अगाडी आए । स्पेनिस ला लिगामा यस सिजन मेस्सीले ३६ गोल गरेका छन् ।
इटालियन सिरिए च्याम्पियन युभेन्टसका लागि रोनाल्डोले २१ गोल गर्न सके । रोनाल्डोले रियलबाट युभेन्टस पुगेको पहिलो सिजनमै प्लेयर अफ दि इयरको उपाधि जिते ।
मेस्सीले क्लबका लागि सर्वाधिक गोल गर्ने खेलाडीको समग्र सूचीमा पनि रोनाल्डोलाई पछि पारे ।ला लिगाको अन्तिम खेलमा इबरबिरुद्ध दुई गोल गरेपछि मेस्सीले रोनाल्डोलाई समग्रमा पछि पारेका हुन् । इबरविरुद्धको गोलसँगै मेस्सीले क्लब फुटबलमा कूल ६०२ गोल पूरा गरेका छन् । मेस्सीले सर्वाधिक गोल गर्दै पीचिची अवार्ड समेत हात पारे । बार्सिलोनाबाट मात्र खेलिरहेका मेस्सीले ६८६ खेल खेलेका छन् ।
रोनाल्डोले स्पोर्टिङ लिस्बोन, म्यानचेस्टर युनाईटेड, रियल म्यड्रिड र युभेन्टसमा खेलेका ८०६ खेलबाट समग्रमा मेस्सीभन्दा एक गोलले पछि परेका रोनाल्डोले हालसम्म ६०१ गोल गरेका छन् ।
