काठमाडौं । नेपाली कांग्रेसको १४ औँ महाधिवेशनको उद्घाटन हुन १९ घन्टा बाँकी रहँदा पनि पार्टीको इतर पक्ष भनिँदै आएको समूहले अरु पदाधिकारी त परै जाओस् सभापतिकै टुंगो लगाउन सकेको छैन । हिजो र आज गरी पटक पटक यस समूहका नेताहरु बसेका छन् तर पनि उनीहरुले सो समूहबाट सभापतिको उम्मेबार को हो भन्ने बारे टुंगो लगाउन नसकेका हुन् ।
यो सँगै नेपाली कांग्रेस संस्थापन इतर समूहबाट सभापतिको साझा उम्मेदवार नबन्ने भएको छ । उता संस्थापन समूहबाट शेरबहादुर देउवा बलियो उम्मेदवारका रुपमा देखिएका बेला वरिष्ठ नेता रामचन्द्र पौडेल समूहको प्रयास भने हिजोदेखि आज साँझसम्म नै असफल भएको छ ।
आफूले यस पटक रामचन्द्रलाई छोडेको भनी सशांक कोइरालाले घोषणा गरेपनि शेखर कोइराला भने कसैलाई छोड्ने पक्षमा देखिएनन् । उता प्रकाशमान सिंहले पनि आफूले कसैलाई नछोड्ने बताएका छन् । उनको अडानका कारण पछिल्लो पटक अप्ठेरो वरिष्ठ नेता रामचन्द्रलाई परेको देखिएको छ । यसैकारण पौडेलले हिजो साँझ चाक्सिबारीमा भएको बैठकमा पौडेलले आफूले राजनीति छोड्ने धम्की दिएका थिए । त्यति गर्दा पनि प्रकाशमान र शेखर टसको मस नभएपछि आजको अवस्था आएको छ ।
आजको पछिल्लो अवस्थामा नेता डा शेखर कोइरालाले १४औं महाधिवेशनमा सभापतिका लागि प्रचार प्लेग नै बनाएर आज साँझदेखि प्रचार नै थालेका छन् । संस्थापनइतर समूहमा सभापतिको साझा उम्मेदवार तय गर्न सकस भइरहेका बेला कोइराला विहीबार अपराह्नदेखि सामाजिक सञ्जालमा ‘एकपटक, यसैपटक’ भन्दै प्रचार अभियान छेडेका छन् ।
संस्थापनइतर समूहमा रामचन्द्र पौडेल, प्रकाशमान सिंह र शेखर सभापतिका आकांक्षी छन् । पछिल्लो समय रामचन्द्र त गलेका त छन् तर उनको गलाईले साझा उम्मेदवारमा सहयोग पुग्दैन ।
किनभने उनले छोडेपनि प्रकाशमानले छोड्न नमानेपछि उता शेखर पनि आफ्नै बाटो हिँडेका हुन् । हुनत अझै पनि साझा उम्मेदबार तय गर्ने विषयमा पटकपटक बसिरहेको उनीहरूको बैठकले बस्ने भनेको छ, तर पनि अब त्यो सम्भव नभएको शेखरका नजिकका एक सहयोगीले बताए ।
प्रकाशमानले सभापतिमा आफ्नो दाबेदारी कायमै रहेको बताएका छन् । शेखरले पनि सभापतिको प्रचार थालेका छन् । तर पनि लामो दौडधुप गरेका पौडेल अन्ततः गलेका छन् । प्रकाशमान र शेखरबीच कुरा नमिल्दा पौडेलको योजना पनि सफल हुन सकेन ।
उता सभापतिबाट ब्याक भएका शशांक भने यतिबेला रहस्यमय ढंगले मौन बसेका छन् । यसकारण देउवा झन्भन्दा झन् बलियो भएका छन् । यतिखेर देशैभरिबाट आएर काठमाडौँमा जम्मा भएका महाधिवेशन प्रतिनिधिहरुले पहिलो चरणमै देउवा सभापति हुने निश्चित भएको बताएका छन् ।
