काठमाडौं । लोकतान्त्रिक समाजवादी पार्टीका अध्यक्ष महन्थ ठाकुरले वर्तमान संविधानप्रति आफ्नो पार्टीको असन्तुष्टि कायमै रहेको बताउनुभएको छ ।
संविधान जारी हुनुपूर्व मस्यौदा सार्वजनिक हुँदा नै मधेशमा असन्तुष्टि रहेको र त्यसले मधेशमा शान्तिपूर्ण आन्दोलनको रुप लिएको उहाँले बताउनुभयो । सोही आन्दोलनका क्रममा पक्राउ परेका आफ्ना पार्टीका नेता तथा कार्यकर्तालाई रिहा गर्न उहाँले आग्रह गर्नुभयो । उहाँले मधेशको मुद्दा सम्बोधन नभए विष्फोट हुने बताउनुभयो ।
नेता ठाकुरले पार्टीमा स्थिरता चाहिने बताउनुभयो । उहाँले भन्नुभयो, ‘पार्टीमा स्थिरता भएन भने सरकार पनि स्थिर हुँदैन ।’ उहाँले सरकार स्थिर नहुँदा नै सरकारी अंग प्रभावित भएको भन्दै संसदीय कार्य र अदालतको काम कारवाहीको उदाहरण दिनुभयो । अहिले बेन्च र बारमा विवाद छ भन्दै उहाँले जनताले पाउनुपर्ने सेवा र न्यायमा असर परिरहेको बताउनुभयो । न्यायालय संवैधानिक निकाय भएकाले अरुले हस्तक्षेप गर्न नमिल्ने भन्दै उहाँले सर्वोच्च अदालत आफैँले यसको समाधान दिनुपर्ने बताउनुभयो ।
