काठमाडौं । अमेरिकाको टेक्सस राज्यमा भएको बन्दुक आक्रमणमा परेर कम्तीमा २० जनाको मृत्यु भएको र २६ जना घाइते भएका छन् ।
घटना अमेरिका र मेक्सिकोको सीमाभन्दा केहीपर रहेको वालमार्ट स्टोरमा भएको हो ।
एल पासो सहरमा भएको उक्त घटना टेक्ससका लागि इतिहासकै सबैभन्दा घातक दिनमध्येको एक रहेको टेक्ससका गभर्नरले बताएका छन्।घटनामा संलग्न भएको भन्दै प्रहरीले एक २१ वर्षीय युवालाई हिरासतमा लिएको छ। अमेरिकी सञ्चारमाध्यमहरूले उनको नाम प्याट्रिक क्रुसिअस रहेको बताएका छन्।
पक्राउ परेका ब्यक्ति एल पासोभन्दा एक हजार ४६ किलोमिटर पूर्वमा पर्ने ड्यालस सहरका बासिन्दा भएको संचार माध्यमले उल्लेख गरेका छन् ।
यता मेक्सिकोका राष्ट्रपतिले आफ्ना तीन नागरिकको मृत्यु भएको बताएका छन् । उक्त घटनामा परेर ६ जना घाइते भएको बताएको रोएटर्स समाचारसंस्थाले जनाएको छ।टेक्ससमा भएको यो घटना अमेरिकाको पछिल्लो कालखण्डको आठौँ घातक बन्दुक आक्रमण भएको बताइन्छ।
पछिल्लो एक सातामा अमेरिकामा भएको यो दोस्रो बन्दुक आक्रमण हो। यसअघि क्यालिफोर्निया राज्यमा गोली लागेर तीन जनाको मृत्यु भएको थियो।
