काठमाडौं। खाद्य स्वच्छता तथा गुणस्तर र औषधिको नियमनलाई थप प्रभावकारी, व्यवस्थित र वैज्ञानिक बनाउने उद्देश्यले खाद्य तथा औषधि प्राधिकरण (एफडीए) स्थापना तथा सञ्चालनसम्बन्धी छलफल गरिएको छ।
स्वास्थ्य तथा खाद्य स्वच्छता मन्त्रालयका सचिव डा. विकास देवकोटाको अध्यक्षतामा मंगलबार बसेको बैठकमा प्रस्तावित प्राधिकरणको कानुनी तथा संस्थागत स्वरूप, कार्यक्षेत्र, संरचना, नियमनकारी जिम्मेवारी र वित्तीय मोडेललगायत विषयमा छलफल भएको हो।
स्वास्थ्य तथा खाद्य स्वच्छतामन्त्री निशा मेहताको विशेष उपस्थितिमा सम्पन्न बैठकमा सङ्घ, प्रदेश र स्थानीय तहबीचको समन्वय तथा प्राधिकरण सञ्चालनका लागि आवश्यक व्यवस्थाबारे पनि विचारविमर्श गरिएको मन्त्रालयले जनाएको छ।
बैठकमा प्रस्तावित प्राधिकरणको भूमिका, विद्यमान नियामक निकायहरूबीचको समन्वय तथा आवश्यक जनशक्ति र स्रोतसाधन व्यवस्थापनका विषयमा छलफल भएको थियो। खाद्य स्वच्छता र गुणस्तर कायम गर्नुका साथै औषधिको नियमनलाई प्रभावकारी बनाउन एकीकृत र वैज्ञानिक नियामक प्रणालीको आवश्यकतामाथि पनि जोड दिइएको थियो।
