काठमाडौं । स्वास्थ्य तथा खाद्य स्वच्छता मन्त्रालयले सरकारी कर्मचारीलाई आकस्मिक अवस्थामा जीवन बचाउन आवश्यक आधारभूत सीप प्रदान गर्ने उद्देश्यले जीवनरक्षा तालिम सुरु गरेको छ।
राष्ट्रिय स्वास्थ्य तालिम केन्द्र, टेकुले आर्थिक वर्ष २०८३/८४ को वार्षिक कार्यक्रमअन्तर्गत विभिन्न मन्त्रालयका कर्मचारीलाई लक्षित गरी आधारभूत जीवन सहायता (बीएलएस) सम्बन्धी एकदिने तालिम सञ्चालन गरेको हो।
तालिममा कार्डियोपल्मोनरी रिससिटेसन (सीपीआर), चोकिङ हुँदा अपनाउनुपर्ने प्राथमिक उपचारका उपायलगायत जीवनरक्षासम्बन्धी व्यावहारिक सीप सिकाइनेछ। आकस्मिक अवस्थामा तत्काल र सही प्रतिक्रिया दिन सक्ने क्षमता विकास गर्नु तालिमको मुख्य उद्देश्य रहेको केन्द्रले जनाएको छ।
मन्त्रालयले प्रधानमन्त्री तथा मन्त्रिपरिषद्को कार्यालयसहित विभिन्न मन्त्रालयलाई पत्राचार गर्दै तालिममा कर्मचारी सहभागी गराउन अनुरोध गरेको थियो। असोज २९ गतेसम्म चार चरणमा सञ्चालन हुने तालिममा सम्बन्धित मन्त्रालयका कार्यालय सहयोगी, पीएसओ तथा सोही प्रकृतिका कर्मचारीका साथै राजपत्र अनङ्कित प्रथम र द्वितीय तहका कर्मचारी सहभागी हुनेछन्।
प्रत्येक मन्त्रालयबाट प्रत्येक चरणमा एक जना कर्मचारी सहभागी गराउने व्यवस्था गरिएको छ। तालिम राष्ट्रिय स्वास्थ्य तालिम केन्द्र, टेकुमा बिहान ९ बजेदेखि सञ्चालन भइरहेको छ।
