काठमाडौं । चीनको शाङ्हाईमा व्यवसाय गर्दै आउनुभएका राजनारायण साहले भोटेकोशी बाढीपीडितका लागि ३० लाख रुपैयाँ सहयोग गर्नुभएको छ।
शुक्रबार अर्थ मन्त्रालय, सिंहदरबारमा अर्थमन्त्री डा. स्वर्णिम वाग्लेसँगको भेटपछि साहले बाढीपीडितको राहतका लागि ३० लाख रुपैयाँको चेक अर्थमन्त्री वाग्लेलाई हस्तान्तरण गर्नुभएको हो।
साह विगत साढे तीन दशकदेखि चीनमा व्यवसाय गर्दै आउनुभएको छ। उहाँले नेपालमा हुने प्राकृतिक विपत्तिका बेला निरन्तर सहयोग गर्दै आउनुभएको छ।
११ वर्षअघि गएको भूकम्पका समयमा पनि साहले नेपाल सरकारलाई नगद तथा जिन्सी सहयोग उपलब्ध गराउनुभएको थियो। त्यस्तै, कोभिड–१९ महामारीका बेला उहाँले करिब ४० लाख रुपैयाँ बराबरका अक्सिजन कन्सन्ट्रेटरलगायत स्वास्थ्य सामग्री बेइजिङस्थित नेपाली दूतावासमार्फत स्वास्थ्य मन्त्रालयलाई उपलब्ध गराउनुभएको थियो।
तराई क्षेत्रमा हुने शीतलहरका समयमा पनि साहले चीनबाट न्यानो कपडा, ब्लाङ्केटलगायत सामग्री पठाएर सहयोग गर्दै आउनुभएको छ।
सिरहाका साह सन् १९९१ मा छात्रवृत्तिमा अध्ययनका लागि चीन जानुभएको थियो। उहाँ इलेक्ट्रिकल इन्जिनियरसमेत हुनुहुन्छ। हाल उहाँ शाङ्हाईमा स्थापित एनआर इलेक्ट्रिक कम्पनीका प्रबन्ध निर्देशक हुनुहुन्छ। उक्त कम्पनीले विद्युत् ट्रान्सफर्मर उत्पादन गरी विश्वका विभिन्न मुलुकमा बिक्री–वितरण गर्दै आएको छ।
