काठमाडौं । ऊर्जा क्षेत्रको विकासका लागि नीतिगत सहजीकरण तथा परियोजना कार्यान्वयनका क्रममा देखिएका समस्या समाधान गर्न ऊर्जा, जलस्रोत तथा सिँचाइ मन्त्रालयले निजी क्षेत्रको समेत सहभागितामा उच्चस्तरीय समिति गठन गरेको छ ।
मन्त्रालयले ऊर्जा क्षेत्रका परियोजनामा देखिएका नीतिगत, कानुनी तथा कार्यान्वयनसम्बन्धी जटिलता पहिचान गरी समाधानका लागि आवश्यक सुझाव दिन समिति गठन गरेको हो ।
समितिको संयोजकमा मन्त्रालयको ऊर्जा महाशाखाका सहसचिव सुनिल पौडेल तोकिनुभएको छ । सदस्यहरूमा मन्त्रालयको कानून तथा फैसला कार्यान्वयन महाशाखाका सहसचिव यज्ञप्रसाद भट्टराई, विद्युत् विकास विभागका उपमहानिर्देशक र नेपाल विद्युत् प्राधिकरणका कार्यकारी निर्देशक दीर्घायु कुमार श्रेष्ठ रहनुभएको छ ।
त्यस्तै, स्वतन्त्र ऊर्जा उत्पादक संस्था नेपाल (इप्पान) बाट नरेन्द्र बल्लभ पन्त, अभिज्ञा मल्ल र अनुप आचार्य समितिको सदस्यमा प्रतिनिधित्व गर्नुहुनेछ । इन्जिनियर शिरिष पाण्डे पनि सदस्य रहनुभएको छ ।
मन्त्रालयको नवीकरणीय ऊर्जा तथा कार्बन व्यापार प्रवद्र्धन शाखाका सिनियर डिभिजनल इन्जिनियर शालिकराम भण्डारीलाई समितिको सदस्यसचिवको जिम्मेवारी दिइएको छ ।
समितिले ऊर्जा क्षेत्रका परियोजना कार्यान्वयनमा देखिने नीतिगत, कानुनी तथा व्यावहारिक समस्या पहिचान गर्नेछ । त्यस्ता समस्या समाधान तथा परियोजनालाई सहजीकरण गर्न आवश्यक नीतिगत र प्रक्रियागत सुझावसमेत समितिले मन्त्रालयलाई दिनेछ ।
मन्त्रालयले निजी क्षेत्रको समेत सहभागिता सुनिश्चित गर्दै ऊर्जा क्षेत्रका परियोजना कार्यान्वयनमा देखिएका समस्या समाधान तथा लगानीमैत्री वातावरण निर्माणमा समितिमार्फत सहजीकरण गर्ने अपेक्षा गरेको छ ।
