काठमाडौँ । संसदीय सुनुवाई समितिले प्रस्तावित १३ जना राजदूतको संसदीय सुनुवाई दशैँअघि नै सम्पन्न गर्ने निर्णय गरेको छ। मंगलबार सिंहदरबारमा बसेको समितिको बैठकले असोज २६, २७ र २८ गते सुनुवाई गर्ने तथा २९ गते प्रतिवेदन लेखन र सिफारिस गर्ने कार्यतालिका तय गरेको हो।
समितिको बैठकमा प्रस्तावित राजदूतहरूको नियुक्ति प्रक्रिया र सुनुवाईको समयतालिकाबारे सांसदहरूबीच लामो छलफल भएको थियो। केही सदस्यले चाडपर्वको समय तथा जिल्ला भ्रमणको कार्यतालिकालाई ध्यानमा राख्दै सुनुवाई दशैँपछि गर्नुपर्ने धारणा राखेका थिए।
तर, विभिन्न कूटनीतिक नियोगमा राजदूतको अभावले पारेको असर र राष्ट्रिय आवश्यकतालाई ध्यानमा राख्दै सुनुवाई प्रक्रिया छिटो टुंग्याउनुपर्नेमा समिति सहमत भएको हो।
समितिले सुनुवाई प्रक्रियालाई औपचारिकतामा मात्र सीमित नगर्ने जनाएको छ। प्रस्तावित राजदूतहरूको बायोडाटा तथा कार्ययोजनाको गम्भीर अध्ययन गरी सुनुवाईलाई रचनात्मक र प्रभावकारी बनाउने निर्णय गरिएको समितिका सभापति बोधनारायण श्रेष्ठले जानकारी दिनुभयो।
उहाँका अनुसार प्रस्तावित १३ राजदूतविरुद्ध सातवटा उजुरी परेका छन्। तीमध्ये दुईवटा उजुरी सबै प्रस्तावित राजदूतविरुद्ध छन् भने पाँचवटा उजुरी एक–एक जना उम्मेदवारलाई लक्षित गरी परेको छ। सामान्य प्रकृतिका उजुरीलाई छिटो टुंग्याइने र जटिल प्रकृतिका उजुरीका हकमा आवश्यक परे छुट्टै उपसमिति गठन गरी छानबिन गरिने उहाँले बताउनुभयो।
मंगलबारको बैठकमा प्रस्तावित राजदूतविरुद्ध परेका उजुरी खोलिनुका साथै उनीहरूले पेस गरेको कार्ययोजना समितिका सदस्यहरूलाई वितरण गरिएको छ।
समितिले प्रधानमन्त्रीको आसन्न भारत भ्रमणलगायतका कूटनीतिक संवेदनशीलतालाई समेत ध्यानमा राखेर सुनुवाई प्रक्रिया दशैँअघि नै सम्पन्न गर्ने निर्णय गरेको हो।
सरकारले भारतका लागि डा. निश्चलनाथ पाण्डे, चीनका लागि डा. कल्याणराज शर्मा र संयुक्त राज्य अमेरिकाका लागि चिरनजङ्ग थापालाई राजदूतमा सिफारिस गरेको छ।
त्यस्तै, संयुक्त अधिराज्य (बेलायत) का लागि अवकाशप्राप्त पूर्वप्रधानसेनापति गौरवशमशेर जबरालाई, जापानका लागि जिग्यानकुमार थापा, इजरायलका लागि सुरेशकुमार कर्ण र स्पेनका लागि प्राप्ति शेरचनलाई सिफारिस गरिएको छ।
जर्मनीका लागि शारू जोशी, ओमानका लागि डा. पद्माक्षी राणा, मलेसियाका लागि चुडामणि खरेल, दक्षिण कोरियाका लागि प्रा. डा. सङ्गम श्रेष्ठ, श्रीलङ्काका लागि डा. मञ्चला झा र साउदी अरेबियाका लागि गिरीबहादुर सुनारको नाम पनि राजदूतका लागि सिफारिस गरिएको छ।
