काठमाडाैँ । जगदम्बा मोटर्स प्रालिले आयोजना गरेको अपाचे रेस एक्सपेरियन्स  रेसिङ क्वालिफायर्सअन्तर्गत बुटवल क्षेत्रबाट १६० सीसी वर्गमा तीन जना राइडर ग्रान्ड फिनालेका लागि छनोट भएका छन्।

तिलोत्तमा–५ स्थित श्री गौराङ्ग इजी वे ट्रायल सेन्टर, कफी कम्पनी, मणिग्राममा शनिबार सम्पन्न क्षेत्रीय क्वालिफायर्समा धीरज बि.क. प्रथम, अभिषेक पन्थी दोस्रो र अरिक श्रेष्ठ तेस्रो भएका हुन्।

धीरजले ३४.०७ सेकेन्डमा रेस पूरा गर्दै पहिलो स्थान हासिल गर्दा अभिषेकले ३४.६२ र अरिकले ३४.८७ सेकेन्डमा रेस पूरा गरेका थिए। उनीहरूले अब ARE GP ग्रान्ड फिनालेमा बुटवलको प्रतिनिधित्व गर्नेछन्।

टीभीएस मोटर कम्पनीको नेपालका लागि आधिकारिक वितरक जगदम्बा मोटर्सले बुटवल क्षेत्रको आधिकारिक डिलर बालाजी अटोमोबाइल्ससँगको सहकार्यमा क्वालिफायर्स आयोजना गरेको हो। प्रतियोगितामा सहभागी हुन ७६ जना राइडरले नाम दर्ता गराएपछि थप दर्ता रोकिएको आयोजकले जनाएको छ।

कार्यक्रममा पूर्व ARE GP नेपाल विजेता तथा मद्रास इन्टरनेसनल सर्किटका विजेता सुजन थापा मगर र ट्र्याक तथा टार्मेक रेसिङकी चार पटककी राष्ट्रिय च्याम्पियन नवाङ मोक्तानले सहभागी राइडरलाई प्रशिक्षण दिएका थिए। प्रशिक्षणमा राइडिङ पोस्चर, कर्नरिङ, लिनिङ, ब्रेकिङ र भिजन कन्ट्रोललगायतका विषयमा सैद्धान्तिक तथा व्यावहारिक जानकारी दिइएको थियो।

प्रशिक्षणपछि १६० सीसी वर्गमा प्रतिस्पर्धात्मक रेस सञ्चालन गरिएको थियो। त्यसबाट उत्कृष्ट तीन राइडरलाई ग्रान्ड फिनालेका लागि छनोट गरिएको हो।

बालाजी अटोमोबाइल्सका प्रबन्ध निर्देशक विशाल जैसवालले बुटवलमा कार्यक्रमप्रति प्राप्त प्रतिक्रिया उत्साहजनक रहेको बताए। ७६ जना राइडर सहभागी हुनु र थप दर्ता रोक्नुपर्ने अवस्थाले बुटवल क्षेत्रमा मोटरस्पोर्ट्सप्रतिको आकर्षण बढ्दै गएको देखाएको उनको भनाइ थियो।

ग्रान्ड फिनालेमा काठमाडौं, बुटवल, नेपालगञ्ज, इटहरी र पोखरामा भएका क्षेत्रीय क्वालिफायर्सबाट छनोट भएका उत्कृष्ट राइडरबीच प्रतिस्पर्धा हुनेछ। आयोजकका अनुसार १६० सीसी र २०० सीसी वर्गका विजेताले भारतको मद्रास इन्टरनेसनल सर्किटमा हुने अन्तर्राष्ट्रिय रेसिङ प्रतियोगितामा नेपालको प्रतिनिधित्व गर्ने अवसर पाउनेछन्।

उक्त अन्तर्राष्ट्रिय प्रतियोगितामा ५० भन्दा बढी देशका राइडर सहभागी हुने जनाइएको छ। अन्तर्राष्ट्रिय प्रतियोगितामा सहभागी हुने नेपाली राइडरको यात्रा तथा आवास खर्च जगदम्बा मोटर्स र टीभीएस मोटर कम्पनी भारतले व्यहोर्ने आयोजकले जनाएको छ।

बुटवल क्वालिफायर्समा सहभागी सबै राइडरलाई प्रमाणपत्र प्रदान गरिएको थियो भने उत्कृष्ट तीन राइडरलाई मञ्चमा सम्मान गरिएको थियो।