काठमाडौं । नेपाली काँग्रेसका सहमहामन्त्री प्रकाश रसाईली ‘स्नेही’ले पार्टीको १५औँ महाधिवेशनमा दलित समावेशीतर्फ सहमहामन्त्री पदमा पुनः उम्मेदवारी दिने घोषणा गर्नुभएको छ ।
काँग्रेसको विशेष महाधिवेशनबाट दलित समावेशीतर्फ सहमहामन्त्री बन्नुभएका रसाईलीले पार्टी सभापति गगनकुमार थापाको नेतृत्वमा आफूले पुनः सोही पदमा उम्मेदवारी दिन लागेको बताउनुभएको हो ।
न्युज एजेन्सी नेपालसँगको कुराकानीमा उहाँले सभापति थापाको नेतृत्वमा काँग्रेसलाई बलियो जनमतसहितको पार्टीका रूपमा पुनः स्थापित गर्ने उद्देश्यले उम्मेदवारी दिन लागेको बताउनुभयो ।
उहाँले १५औँ महाधिवेशन काँग्रेसको आन्तरिक जीवनसँगै राष्ट्रिय राजनीतिमा देखिएका चुनौती सामना गर्ने महत्वपूर्ण अवसर भएको बताउनुभयो । महाधिवेशनले पार्टीलाई नयाँ जीवन दिनुका साथै मुलुकलाई नयाँ दिशातर्फ अघि बढाउन कोशेढुंगा सावित हुने उहाँको भनाइ छ ।
मुलुकमा देखिएको चुनौती र नागरिकमा बढेको निराशा अन्त्य गर्दै बलियो काँग्रेसमार्फत देशको समृद्धिको यात्रा अघि बढाउन महाधिवेशनले महत्वपूर्ण भूमिका खेल्ने उहाँले बताउनुभयो ।
रसाईलीले सभापति थापाको नेतृत्वमा उपसभापति विश्वप्रकाश शर्मासहित पार्टीको नेतृत्वपंक्तिसँग सहकार्य गर्दै काँग्रेसलाई अघि बढाउने प्रतिबद्धता पनि व्यक्त गर्नुभयो ।
उहाँले वीपी कोइरालाको नेतृत्वकालदेखि नै काँग्रेसले सबै जातजाति, वर्ग, लिङ्ग, धर्म र समुदायको प्रतिनिधित्व हुनेगरी समावेशी राजनीतिक चरित्र निर्माण गरेको उल्लेख गर्नुभयो । वर्तमान नेतृत्वले पनि नेपालको विविधता प्रतिबिम्बित हुनेगरी पार्टीको विधान र संरचना निर्माण गरेको उहाँको दाबी छ ।
‘यो महाधिवेशनबाट फेरि पनि गगन थापाकै नेतृत्वमा मैले सहमहामन्त्रीको रूपमा आफ्नो उम्मेदवारी तय गरेको छु,’ उहाँले भन्नुभयो, ‘बलियो काँग्रेस र बलियो देश तथा नेपाली जनताको समृद्धिको यात्रालाई पूरा गर्न हामी अघि बढ्नेछौँ ।’
रसाईली १४औँ महाधिवेशनमा दलित समावेशीतर्फबाट काँग्रेसको केन्द्रीय सदस्य निर्वाचित हुनुभएको थियो । १५औँ महाधिवेशनका लागि उहाँ बझाङबाट महाधिवेशन प्रतिनिधि निर्वाचित हुनुभएको छ ।
