काठमाडौं । प्रतिनिधि सभाको शुक्रवार बसेको बैठकले राष्ट्रिय प्रतिरक्षा विश्वविद्यालय, फोहोरमैला व्यवस्थापन, स्वास्थ्यलगायत विभिन्न क्षेत्रसँग सम्बन्धित सातवटा विधेयक दफावार छलफलका लागि सम्बन्धित संसदीय समितिमा पठाएको छ ।
बैठकमा पेश भएका प्रस्तावमध्ये ‘केही नेपाल ऐनको व्यवस्था जगाउने विधेयक, २०८३’ बहुमतले स्वीकृत भएको थियो भने बाँकी छवटा विधेयक सर्वसम्मतिले स्वीकृत भएका थिए ।
सभामुखको अनुमतिमा प्रधानमन्त्री बालेन्द्र साहको तर्फबाट कानून, न्याय तथा संसदीय मामिलामन्त्री सोविता गौतमले ‘केही नेपाल ऐनको व्यवस्था जगाउने विधेयक, २०८३’ लाई दफावार छलफलका लागि समितिमा पठाइयोस् भन्ने प्रस्ताव प्रस्तुत गर्नुभएको थियो ।
यस्तै, प्रधानमन्त्री तथा रक्षा मन्त्री साहकै तर्फबाट मन्त्री गौतमले प्रस्तुत गर्नुभएको ‘राष्ट्रिय प्रतिरक्षा विश्वविद्यालय विधेयक, २०८३’ पनि सर्वसम्मतिले स्वीकृत भई सम्बन्धित समितिमा पठाइएको छ ।
पूर्वाधार विकासमन्त्री सुनिल लम्सालले प्रस्तुत गर्नुभएको ‘फोहोरमैला व्यवस्थापन विधेयक, २०८३’ तथा महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सीता बादीले प्रस्तुत गर्नुभएको ‘महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा सम्बन्धी केही नेपाल ऐन संशोधन गर्ने विधेयक, २०८३’ पनि सर्वसम्मतिले समितिमा पठाइएका छन् ।
यसैगरी, स्वास्थ्य तथा खाद्य स्वच्छता मन्त्रालयअन्तर्गतका चारवटा विधेयक पनि दफावार छलफलका लागि सम्बन्धित समितिमा पठाइएको छ । स्वास्थ्य तथा खाद्य स्वच्छतामन्त्री निशा मेहताले प्रस्तुत गर्नुभएको ‘आमाको दूधलाई प्रतिस्थापन गर्ने वस्तु बिक्री वितरण नियन्त्रण (पहिलो संशोधन) विधेयक, २०८३’, ‘सुरक्षित मातृत्व तथा प्रजनन स्वास्थ्य अधिकार (पहिलो संशोधन) विधेयक, २०८३’, ‘स्वास्थ्यकर्मी तथा स्वास्थ्य संस्थाको सुरक्षा सम्बन्धी (दोस्रो संशोधन) विधेयक, २०८३’ र ‘रामराजाप्रसाद सिंह स्वास्थ्य विज्ञान प्रतिष्ठान विधेयक, २०८३’ लाई सभाले सर्वसम्मतिले समितिमा पठाउने निर्णय गरेको हो ।
