काठमाडाैँ । राष्ट्रियसभाअन्तर्गत विकास, आर्थिक मामिला तथा सुशासन समितिले कोप–३१ मा नेपालको हितका लागि सावधानीपूर्वक वार्ता गर्ने गरी तयारी थाल्न निर्देशन दिएको छ ।
समितिका सभापति कृष्णप्रसाद पौडेलले जलवायु परिवर्तनबाट नेपालजस्तो भौगोलिक बनोट भएको मुलुकमा परेको प्रभावलाई ध्यानमा राख्दै अन्तरराष्ट्रिय मञ्चमा नेपालको हित सुनिश्चित हुनेगरी सावधानीपूर्वक वार्ता गर्नुपर्ने बताउनुभयो ।
समितिले संयुक्त राष्ट्रसङ्घीय जलवायु परिवर्तनसम्बन्धी सम्मेलन (कोप–३१) का सम्बन्धमा आज आयोजना गरेको छलफलमा उहाँले जलवायु परिवर्तनका प्रभावलाई समितिले सुरुदेखि नै प्राथमिकतामा राखेर निरन्तर छलफल गर्दै आएको बताउनुभयो ।
सभापति पौडेलले कोप–३१ मा नेपालको हितमा प्रभावकारी वार्ता गर्न आवश्यक आधार तयार पार्न सम्बन्धित सबै साझेदारसँग छलफल गरी आवश्यक दस्तावेज तयार गर्ने काम भइरहेको जानकारी दिनुभयो । उहाँले यस विषयमा समितिका सचिवलगायत सम्बन्धित कर्मचारीले विश्लेषणात्मक अध्ययन गरिरहेको बताउनुभयो ।
“हाम्रो सावधानीपूर्वक वार्ता गर्ने क्षमताको अभावले विगतमा धेरै दुःख पाएको जस्तो लाग्छ”, उहाँले भन्नुभयो, “राजनीतिक नेतृत्वको प्रतिबद्धता महत्वपूर्ण छ भने प्रक्रिया र प्राविधिक पक्षलाई व्यवस्थित गर्ने जिम्मेवारी कर्मचारीतन्त्रको हो ।”
उहाँले कोप–३१ को तयारी तथा वार्ताका क्रममा नेपालको हितलाई केन्द्रमा राखेर आवश्यक विषयमा संवेदनशील हुन सम्बन्धित पक्षलाई आग्रह गर्नुभयो । वार्ताका लागि तथ्य र प्रमाणमा आधारित तयारी आवश्यक रहेको उल्लेख गर्दै उहाँले कर्मचारी तहबाट तथ्य र तथ्याङ्कसहित प्रस्तुत गरिएको विश्लेषणात्मक सामग्री महत्त्वपूर्ण रहेको बताउनुभयो ।
सभापति पौडेलले कोप–३१ का लागि नेपालको धारणा स्पष्ट बनाउन समितिले सम्बन्धित सरोकारवालासँग निरन्तर छलफल गर्ने बताउनुभयो । बैठकमा समितिका सदस्य तथा सम्बन्धित मन्त्रालयका अधिकारीहरूले नेपालले कोप–३१ मा उठाउनुपर्ने जलवायु न्याय, जलवायु वित्त, हानि तथा क्षति, अनुकूलन तथा जलवायुजन्य विपद्का विषयमा धारणा राख्नुभएको थियो ।
