काठमाडौं । प्रतिनिधि सभाको मंगलवारको बैठकमा ‘रामराजाप्रसाद सिंह स्वास्थ्य विज्ञान प्रतिष्ठान स्थापना गर्न बनेको विधेयक, २०८३’ माथि सैद्धान्तिक छलफल भएको छ ।
गणतन्त्रका योद्धा रामराजाप्रसाद सिंहको स्मृतिमा स्थापना गर्न लागिएको प्रतिष्ठानले मधेस प्रदेशको स्वास्थ्य सेवा तथा शिक्षामा गुणात्मक सुधार ल्याउने भन्दै सांसदहरूले विधेयकलाई समयसापेक्ष कदमका रूपमा समर्थन गरेका छन् । उनीहरूले प्रतिष्ठानलाई मधेसको स्वास्थ्य अधिकार सुनिश्चित गर्ने महत्वपूर्ण माध्यमका रूपमा विकास गर्नुपर्नेमा जोड दिएका छन् ।
छलफलमा सांसद रमेशकुमार मल्लले प्रतिष्ठानलाई भवन तथा भौतिक संरचना निर्माणमा मात्र सीमित नगरी दक्ष स्वास्थ्य जनशक्ति उत्पादन र अनुसन्धानको केन्द्रका रूपमा विकास गर्नुपर्ने बताउनुभयो । उहाँले गजेन्द्रनारायण सिंह अस्पताललाई प्रतिष्ठानको अस्पतालका रूपमा सञ्चालन गर्दा उत्पन्न हुनसक्ने व्यवस्थापकीय चुनौतीप्रति सचेत हुनुपर्ने भन्दै बर्दिबास मेडिकल कलेजको कामलाई पनि सँगसँगै अघि बढाउन आग्रह गर्नुभयो ।
सांसद आशा झाले प्रतिष्ठान स्थापना भएपछि मधेस र कोशी प्रदेशका साथै सीमावर्ती भारतीय नागरिकले समेत सहज रूपमा स्वास्थ्य सेवा पाउने विश्वास व्यक्त गर्नुभयो । करिब ३० अर्ब रुपैयाँ लागत अनुमान गरिएको परियोजनाले दक्षिण एसियाकै उत्कृष्ट स्वास्थ्य संस्था बन्ने लक्ष्य राखेको उल्लेख गर्दै उहाँले विधेयक शीघ्र पारित गर्न माग गर्नुभयो ।
त्यस्तै, सांसद युवराज दुलालले संघीयताको मर्मअनुसार प्रादेशिक सन्तुलन कायम गर्न विशिष्टीकृत स्वास्थ्य संस्थाको आवश्यकता रहेको बताउनुभयो । प्रतिष्ठानलाई प्राज्ञिक स्वायत्तता प्रदान गर्दै न्याम्सलगायत संस्थामा देखिएको दोहोरो शासनको समस्याबाट मुक्त राख्नुपर्ने र प्रशासनिक रूपमा चुस्त बनाउनुपर्ने उहाँको सुझाव थियो ।
सांसद प्रमिला कुमारीले प्रतिष्ठान स्थापनाको उद्देश्य सकारात्मक भए पनि उत्पादित स्वास्थ्य जनशक्तिलाई स्वदेशमै टिकाइराख्नु चुनौतीपूर्ण रहेको बताउनुभयो । दक्ष जनशक्ति विदेश पलायन हुने समस्या रोक्न स्वास्थ्य शिक्षा र रोजगारीबीच उचित तादाम्यता कायम गर्नुपर्नेमा उहाँले जोड दिनुभयो ।
छलफलमा सहभागी अधिकांश सांसदले प्रतिष्ठानलाई गुणस्तरीय स्वास्थ्य सेवा, स्वास्थ्य शिक्षा र अनुसन्धानको प्रभावकारी केन्द्रका रूपमा विकास गर्नुपर्नेमा जोड दिँदै विधेयकको सैद्धान्तिक पक्षमा समर्थन जनाएका छन् ।
