काठमाडौँ । अविरल वर्षाका कारण पहिरो खसेर अवरुद्ध बनेको पृथ्वी राजमार्गअन्तर्गत मलेखु–मुग्लिङ सडकखण्ड खुलाउन १० वटा हेभी मेसिन परिचालन गरिएको छ ।
विपद् व्यवस्थापन टोली र सडक डिभिजन कार्यालयको समन्वयमा डोजर, एक्साभेटर तथा लोडरसहितका मेसिन परिचालन गरी सडकमा खसेको लेदो, ढुङ्गा तथा माटो पन्छाउने काम तीव्र पारिएको हो ।
लगातारको भारी वर्षाका कारण मलेखुदेखि मुग्लिङसम्म विभिन्न स्थानमा ठूलो पहिरो खसेपछि सडकमा यातायात पूर्ण रूपमा प्रभावित भएको थियो । सडक अवरुद्ध भएपछि यात्रु तथा सवारीसाधन बाटोमै रोकिएका छन् ।
पहिरो पन्छाउने क्रममा माथिबाट ढुङ्गा खस्ने जोखिम तथा निरन्तर वर्षा भइरहे पनि प्राविधिक टोलीले काम जारी राखेको छ । सडकलाई सकेसम्म चाँडो एकतर्फी सञ्चालनमा ल्याएर रोकिएका सवारीसाधनलाई सुरक्षित रूपमा गन्तव्यतर्फ पठाउने तयारी भइरहेको स्थानीय प्रशासनले जनाएको छ ।
मनसुन सक्रिय भएसँगै देशका विभिन्न नदी तथा खोलामा बाढी आउनुका साथै पहाडी क्षेत्रमा पहिरो जाने क्रम बढेको छ । पृथ्वी राजमार्गलगायत अन्य रणनीतिक सडकसमेत अवरुद्ध हुँदा यातायात तथा दैनिक जनजीवन प्रभावित भएको छ ।
सुरक्षा निकाय तथा सडक विभागले पहिरोको जोखिम रहेका सडकमा अत्यावश्यक कामबाहेक यात्रा नगर्न तथा यात्रा गर्नुअघि सडकको अवस्थाबारे जानकारी लिन सर्वसाधारणलाई आग्रह गरेका छन् ।
