महोत्तरी । राष्ट्रिय निजी तथा आवासीय विद्यालय एसोसिएसन नेपाल (नेसनल प्याब्सन), मधेस प्रदेशको तेस्रो प्रदेश अधिवेशन सम्पन्न भएको छ । महोत्तरीको बर्दिबासस्थित होटल नाब्यामा असोज ३ र ४ गते आयोजित अधिवेशनले प्रभुलाल कुशवाहाको अध्यक्षतामा नयाँ प्रदेश कार्यसमिति सर्वसम्मत चयन गरेको हो ।
मधेस प्रदेशका शिक्षा तथा संस्कृति मन्त्री मनोजकुमार सिंहको प्रमुख आतिथ्यता तथा नेसनल प्याब्सनका राष्ट्रिय अध्यक्ष एवं संविधानसभा सदस्य गीता राणा क्षेत्रीको विशेष आतिथ्यतामा अधिवेशन सम्पन्न भएको थियो । अधिवेशनको अध्यक्षता नेसनल प्याब्सन मधेस प्रदेशका अध्यक्ष डा. नन्दन यादवले गरेका थिए ।
अधिवेशनमा नेसनल प्याब्सनका कार्यवाहक केन्द्रीय अध्यक्ष तथा अधिवेशन संयोजक पाण्डव हमाल ठकुरी, पूर्व अध्यक्ष कर्णबहादुर शाही, वरिष्ठ उपाध्यक्ष ब्रजेन्द्र मिश्रा, केन्द्रीय पदाधिकारी तथा सदस्यहरू, विभिन्न प्रदेशका अध्यक्ष तथा पदाधिकारीका साथै मधेस प्रदेशका आठवटै जिल्लाबाट आएका विद्यालय सञ्चालक तथा प्रतिनिधिको सहभागिता रहेको थियो ।
अधिवेशनबाट अध्यक्ष कुशवाहाको नेतृत्वमा २० सदस्यीय प्रदेश कार्यसमिति सर्वसम्मत निर्वाचित भएको छ । थप पाँच सदस्य मनोनयन गरिएपछि समिति २५ सदस्यीय हुने जनाइएको छ ।
नवनिर्वाचित नेतृत्वले निजी तथा संस्थागत विद्यालयको हकहित संरक्षण, शिक्षाको समग्र विकास तथा विद्यालय सञ्चालक, शिक्षक, विद्यार्थी र अभिभावकका साझा सवाल सम्बोधनलाई प्राथमिकतामा राखेर काम गर्ने प्रतिबद्धता जनाएको छ । साथै मधेस प्रदेशको शैक्षिक उन्नयनका लागि प्रभावकारी र परिणाममुखी कार्यक्रम अघि बढाउने अपेक्षा गरिएको छ ।
प्रमुख निर्वाचन अधिकृत अधिवक्ता नरेन्द्रबहादुर भट्टराईले नवनिर्वाचित अध्यक्ष, पदाधिकारी तथा सदस्यलाई पद तथा गोपनीयताको शपथ गराउँदै प्रमाणपत्र वितरण गरेका थिए । उनले निर्वाचन समितिको तर्फबाट नवनिर्वाचित प्रदेश नेतृत्वलाई बधाई तथा आगामी कार्यकालका लागि शुभकामना व्यक्त गरेका थिए ।
अधिवेशनले संगठनभित्रको एकता, सहकार्य, आपसी विश्वास र साझा उद्देश्यप्रतिको प्रतिबद्धतालाई थप मजबुत बनाएको आयोजकले जनाएको छ ।
