काठमाडाैँ । काठमाडौं महानगरपालिकाकी कार्यवाहक प्रमुख सुनिता डंगोलले सार्वजनिक यातायात सेवा दिउँसोमा मात्र सीमित नभई रातिसमेत विस्तार गर्नुपर्ने बताउनुभएको छ ।
ललितपुरमा आयोजित काठमाडौं उपत्यका रात्रिकालीन बस सेवा विस्तार कार्यक्रममा बोल्दै उहाँले स्थानीय सरकारको महत्वपूर्ण दायित्वमध्ये यातायात सेवाको विस्तार पनि रहेको बताउनुभयो । रात्रिकालीन बस सेवा सञ्चालनसँगै काठमाडौं उपत्यका दिउँसो मात्र नभई रातिसमेत चलायमान बन्ने उहाँको भनाइ थियो ।
डंगोलका अनुसार वैशाख १ गतेदेखि परीक्षणका रूपमा बुढानीलकण्ठ–ललितपुरको लगनखेल र विमानस्थल–चन्द्रागिरि रुटमा रात्रिकालीन बस सेवा सञ्चालन गरिएको थियो । पहिलो ९० दिनमै ६७ हजार यात्रुले उक्त सेवा लिएको उहाँले जानकारी दिनुभयो ।
उहाँले सार्वजनिक यातायातलाई केवल आवतजावतको साधनका रूपमा मात्र नभई अवसर र पहुँचको माध्यमका रूपमा बुझ्नुपर्ने बताउनुभयो । नियमित कार्यालय समयबाहेक रातिसम्म काम गर्ने श्रमिक, विद्यार्थी, महिला तथा युवालाई सुरक्षित यातायात सेवाले सहज रूपमा घर फर्किने वातावरण निर्माण गर्ने उहाँको भनाइ थियो ।
डंगोलले भन्नुभयो, “स्थानीय सरकारको महत्वपूर्ण दायित्वमध्ये एउटा स्थानीय यातायातको विस्तार गर्नु हो । त्यो दिउँसो मात्रै होइन, अब राति पनि यातायात चल्नुपर्छ । काठमाडौं उपत्यका दिउँसो मात्र चलायमान छैन, अब राति पनि चलायमान हुन्छ ।”
उहाँले पहिलो ९० दिनमै ६७ हजार यात्रुले रात्रिकालीन बस सेवा प्रयोग गर्नुले काठमाडौं रातिमा पनि चलायमान रहेको पुष्टि गरेको बताउनुभयो ।
रात्रिकालीन सार्वजनिक यातायातले राति काम गर्ने श्रमिक, विद्यार्थी, महिला तथा युवालाई सुरक्षित आवागमनको सुविधा उपलब्ध गराउने उल्लेख गर्दै उहाँले सार्वजनिक यातायातलाई सहरका अवसर र सेवासँग जोड्ने माध्यमका रूपमा विकास गर्नुपर्नेमा जोड दिनुभयो ।
रात्रिकालीन सार्वजनिक यातायात सेवाले काठमाडौं महानगरपालिकामा मात्र सीमित नभई काठमाडौं उपत्यकाका विभिन्न सहरलाई आपसमा जोड्ने भएकाले यसको विस्तार आवश्यक रहेको डंगोलले बताउनुभयो।
