काठमाडाैँ । ललितपुर महानगरपालिकाका प्रमुख चिरिबाबु महर्जनले काठमाडौं उपत्यकामा सञ्चालन हुने रात्रिकालीन बस सेवा निःशुल्क गर्न प्रस्ताव गर्नुभएको छ ।
ललितपुरमा आयोजित काठमाडौं उपत्यका रात्रिकालीन बस सेवा विस्तार कार्यक्रममा बोल्दै महर्जनले राति सार्वजनिक यातायात प्रयोग गर्ने श्रमिक तथा न्यून आय भएका वर्गलाई लक्षित गरी रात्रिकालीन बस सेवा निःशुल्क गर्नुपर्ने बताउनुभएको हो ।
उहाँले रात्रिकालीन बस सञ्चालनमा लाग्ने खर्च काठमाडौं उपत्यकाका १८ वटै स्थानीय तहले मिलेर व्यहोर्नुपर्ने प्रस्ताव गर्नुभयो । त्यसका लागि काठमाडौं र ललितपुर महानगरपालिकाले तुलनात्मक रूपमा ठूलो हिस्सा व्यहोर्न तयार रहेको उहाँको भनाइ थियो ।
महर्जनले हाल रात्रिकालीन बस सेवाको खर्च धान्नका लागि कायम गरिएको बराबरी अवस्थालाई यथावत् राख्दै निश्चित मिति तोकेर त्यसपछि सेवा निःशुल्क घोषणा गर्नुपर्ने बताउनुभयो । उहाँले आगामी वैशाख १ गते वा उपयुक्त कुनै दिनलाई कटअफ मिति तोकेर रात्रिकालीन बस सेवा निःशुल्क गर्न प्रस्ताव गर्नुभयो ।
रात्रिकालीन बस सेवा प्रयोग गर्नेमा सुरक्षा गार्डलगायत न्यून आय भएका श्रमिकको संख्या बढी रहेको उल्लेख गर्दै उहाँले निःशुल्क सेवा उनीहरूका लागि स्थानीय तहले दिने उपहारजस्तै हुने बताउनुभयो ।
महर्जनले १८ वटै स्थानीय तहको सहकार्यमा खर्च व्यवस्थापन गरेर रात्रिकालीन बस सेवा निःशुल्क गर्न सके सार्वजनिक यातायात क्षेत्रमा महत्वपूर्ण परिवर्तन ल्याउन सकिने दाबी गर्नुभयो ।
उहाँले काठमाडौं उपत्यकामा मेट्रो रेल सञ्चालन हुन अझै लामो समय लाग्नसक्ने भएकाले त्यस अवधिसम्म सार्वजनिक यातायातको विकल्पका रूपमा बस सेवालाई व्यवस्थित र विस्तार गर्नुपर्नेमा जोड दिनुभयो । मेट्रोका लागि काम सुरु भए पनि सञ्चालनमा आउन लामो समय लाग्ने भएकाले तत्कालै सार्वजनिक यातायात सुधारका काम अघि बढाउनुपर्ने उहाँको भनाइ थियो ।
महर्जनले विद्युतीय बसमार्फत साझा यातायातले दिइरहेको सेवाको प्रशंसा गर्दै रात्रिकालीन सार्वजनिक यातायातलाई थप प्रभावकारी बनाउन यस्ता सेवाको विस्तार आवश्यक रहेको बताउनुभयो ।
