काठमाडौं । नुवाकोटको बेत्रावतीमा बाढीले पुरिएको घरबाट एक महिलाको जीवितै उद्धार गरिएको छ।
सशस्त्र प्रहरी प्रवक्ता नेत्रबहादुर कार्कीका अनुसार आनन्द श्रेष्ठको घर बाढीले पुरिएपछि खोजी तथा उद्धारका क्रममा ती महिलालाई जीवितै उद्धार गरिएको हो। उद्धार गरिएकी महिलाको थप विवरण खुल्न बाँकी छ।
यसअघि नेपाली सेनाको टोलीले अपर त्रिशूली–१ जलविद्युत् आयोजनाबाट एक चिनियाँ नागरिकको समेत उद्धार गरेको थियो। त्यस्तै, बिहीबार त्रिशूली–३ ए जलविद्युत् आयोजनाको सुरुङबाट दुई जनालाई जीवितै उद्धार गरिएको थियो।
भोटेकोशीमा आएको भीषण बाढीका कारण प्रभावित क्षेत्रमा उद्धार तथा खोजी कार्य जारी रहेको छ।
