काठमाडौँ । नेकपा एमालेका अध्यक्ष केपी शर्मा ओलीले भोटेकोशी बाढीबाट भएको जनधनको क्षति अत्यन्तै गम्भीर र अकल्पनीय रहेको बताएका छन्।
उनले राष्ट्रिय शोक र संकटको समयमा राजनीतिक प्रतिस्पर्धाभन्दा उद्धार, राहत तथा पुनःस्थापनालाई प्राथमिकता दिनुपर्नेमा जोड दिएका छन्।
आइतबार काठमाडौँमा आयोजित अन्तरक्रियामा अध्यक्ष ओलीले विपत्तिमा परेका नागरिकको पीडा साझा भएकाले सबै पक्षले सहयोगको हात बढाउनुपर्ने बताए। उनले तीन तहका सरकार, विभिन्न संघसंस्था तथा परोपकारी व्यक्ति एकजुट भएर प्रभावित नागरिकको उद्धार र राहतमा लाग्नुपर्ने धारणा राखे।
तर विपत्तिको समयमा सरकारले राज्य संयन्त्रको प्रभावकारी परिचालन गर्न नसकेको भन्दै ओलीले सरकारको आलोचना गरे। उनका अनुसार प्रदेश र स्थानीय सरकारसँग समन्वय गरेर अघि बढ्नुपर्नेमा केन्द्र सरकारको भूमिका नागरिकका लागि पहुँचबाहिरजस्तो देखिएको छ।
ओलीले भने, “सरकारले राज्यको सामर्थ्य कब्जा गर्यो। अगम्य, अप्राप्य र अदृश्यजस्तो भयो।”
उनले राहत तथा उद्धारमा श्रेय लिने प्रतिस्पर्धा नगर्ने विषयमा राजनीतिक दलहरूबीच प्रतिबद्धता भइसके पनि केही निजी संघसंस्थालाई खोज तथा उद्धारमा समेत सहभागी हुन नदिइएको दाबी गरे।
भोटेकोशी बाढीपछिको उद्धार, राहत र पुनर्निर्माणमा आफ्नै पहलमा सक्रिय भएको भन्दै ओलीले बागमती प्रदेश सरकारलाई धन्यवादसमेत दिए। उनका अनुसार विपत्तिको सामना गर्न सबै तह र पक्षबीच प्रभावकारी समन्वय आवश्यक छ।
