काठमाडौँ।नेपाली कम्युनिस्ट पार्टीका नेता महेन्द्र राय यादवले कम्युनिस्ट पार्टीहरूले सत्ता र गठबन्धनको राजनीतिक जोड घटाउभन्दा जनजीविकाका सवाल र वैचारिक संघर्षलाई प्राथमिकता दिनुपर्नेमा जोड दिनुभएको छ ।
शनिवार जनकपुरमा आयोजित एक कार्यक्रममा बोल्दै नेता यादवले कम्युनिस्ट पार्टी जनताको वर्गीय मुक्तिका लागि स्थापना भएको स्मरण गराउँदै जनतालाई धोका दिन नहुने बताउनुभएको हो ।
उहाँले वर्तमान समयमा राजनीतिमा वर्गीय मुद्दा ओझेलमा परेर जातीय र वर्णका मुद्दाहरू हाबी हुँदै गएकोमा चिन्ता व्यक्त गर्नुभयो । नेकपा एमाले र माओवादी केन्द्र दुवैमा रहेर काम गरिसकेको आफ्नो अनुभव सुनाउँदै नेता यादवले पछिल्लो समय कम्युनिस्ट आन्दोलनमा देखापरेका उतारचढाव र विभाजनका घटनाहरूको समीक्षा हुनुपर्ने बताउनु भयो ।
हालैका राजनीतिक घटनाक्रमहरूमा वैदेशिक र साम्राज्यवादी शक्तिहरूले चलखेल गरी कम्युनिस्ट आन्दोलनलाई कमजोर बनाउन खोजेको उहाँको विश्लेषण छ ।
उहाँले भन्नुभयो, ‘कम्युनिस्ट पार्टीको विकासका लागि वैचारिक स्पष्टता, राजनीतिक शिक्षा र सुदृढ संगठनात्मक ढाँचा अपरिहार्य छ ।
जबसम्म पार्टीलाई वैचारिक संगठनको रूपमा विकास गर्न सकिँदैन, तबसम्म कम्युनिस्ट आन्दोलनले सार्थकता पाउन सक्दैन । देशमा अस्थिरता र उत्पात मच्चाउन साम्राज्यवादी शक्तिहरू सक्रिय छन्।
यस्तो अवस्थामा एकअर्कामाथि आरोप–प्रत्यारोप गर्नुभन्दा आफ्ना कमी–कमजोरीहरू स्वीकार गर्दै नयाँ ढङ्गले अगाडि बढ्नु आवश्यक छ । हामीलाई केवल सत्ताका लागि गरिने गठबन्धन होइन, बरु जनताको विश्वास जितेर प्राप्त हुने स्पष्ट बहुमत आवश्यक छ । अहिलेको मुख्य आवश्यकता भनेको जनताको जनजीविकासँग जोडिएका मुद्दाहरूमा संघर्ष गर्नु र पार्टीलाई वैचारिक रूपमा सबल बनाउनु हो ।’
मधेस प्रदेशको सन्दर्भमा बोल्दै नेता यादवले किसानका समस्या, मलखादको अभाव र स्थानीय तहमा व्याप्त अनियमितता विरुद्ध पार्टीले सशक्त आवाज उठाउनुपर्ने बताउनु भयो ।
उहाँले कम्युनिस्ट पार्टीहरू सत्तामा पुग्नकै लागि मात्र गरिने अप्राकृतिक गठबन्धनको संस्कृतिमा रमाउन नहुने तर्क गर्नुभयो ।
नेता यादवले निराशामा रहेका जनताबीच आशा र विश्वास सञ्चार गर्न कम्युनिस्ट पार्टीहरूले आत्मसमीक्षासहित जनताका आधारभूत समस्या समाधानमा केन्द्रित हुनुपर्नेमा जोड दिनुभयो । –न्युज एजेन्सी नेपाल
