ललितपुर । जेनजी आन्दोलनका क्रममा आगजनीबाट क्षतिग्रस्त ललितपुरको भैंसेपाटीस्थित मन्त्रीनिवासका भवनहरूको पुनर्निर्माण तथा मर्मतसम्भार अन्तिम चरणमा पुगेको छ।
करिब तीन अर्ब रुपैयाँ लागतमा निर्माण भएको मन्त्रीनिवासको पुनर्निर्माण तथा मर्मतका लागि हालसम्म तथा थप गरी करिब ४२ करोड रुपैयाँ खर्च हुने जनाइएको छ। पूर्वाधार विकास मन्त्रालयअन्तर्गतको संघीय सचिवालय निर्माण तथा व्यवस्थापन कार्यालयले पुनर्निर्माण तथा मर्मतको काम भइरहेको जनाएको छ।
गत भदौ २३ र २४ गते भएको जेनजी आन्दोलनका क्रममा भैंसेपाटीस्थित मन्त्रीनिवासका २७ वटा ब्लकमध्ये २६ वटा ब्लकमा आगजनी भएको थियो। आगलागीका कारण भवनका विभिन्न संरचना, विद्युतीय प्रणाली, झ्यालढोका तथा अन्य भौतिक पूर्वाधारमा ठूलो क्षति पुगेको थियो।
आगलागीबाट क्षतिग्रस्त संरचनाको पुनर्निर्माणसँगै आवश्यक मर्मतसम्भार र प्राविधिक सुधारका कामसमेत अघि बढाइएको कार्यालयले जनाएको छ। अहिले अधिकांश काम सम्पन्न भइसकेकाले पुनर्निर्माण तथा मर्मतको काम अन्तिम चरणमा पुगेको हो।
मन्त्रीनिवासका भवनहरूमा भएको क्षतिको मूल्याङ्कन गरी आवश्यकताअनुसार पुनर्निर्माण, मर्मत तथा संरचनागत सुधारको काम अघि बढाइएको कार्यालयले जनाएको छ।
तस्बिर: घनश्याम श्रेष्ठ-रासस
