काठमाडौं । असन बजार काठमाडौंको पुरानो र व्यस्त बजारमध्ये एक हो। यहाँ दैनिक उपभोग्य वस्तुदेखि खाद्यान्न, मसला, कपडा तथा विभिन्न सामग्री खरिद गर्न उपत्यकाका विभिन्न स्थानबाट मानिसहरू आउने गर्छन्।
विशेषगरी बिहानको समयमा ताजा तरकारी तथा खाद्य सामग्री खरिद गर्ने उपभोक्ताको संख्या उल्लेख्य हुने गरेको छ। दैनिक उपभोगका लागि आवश्यक तरकारी खरिद गर्न विभिन्न क्षेत्रबाट आएका उपभोक्ताले असनका पसल तथा सडकछेउका तरकारी स्टलमा भीड बढाएका छन्।
बिहानको समयमा असन बजारमा किसान तथा व्यापारीले ल्याएका हरियो सागसब्जी, गोलभेँडा, आलु, प्याज, काउली, बन्दा, भिन्डी, करेला, लौका, खुर्सानीलगायतका तरकारी बिक्रीका लागि राखिएका छन्। उपभोक्ताहरू आफूलाई आवश्यक पर्ने तरकारीको गुणस्तर, ताजापन र मूल्य तुलना गर्दै खरिद गरिरहेका देखिन्छन्।
तरकारी बजारमा किनमेल गर्न आउने उपभोक्ताका कारण असनका साँघुरा गल्ली र सडकमा बिहानैदेखि चहलपहल हुने गरेको छ। काठमाडौं महानगरपालीले बिहान ८ बजे सम्म सडकमा ब्यापार गर्न दिने गरेको छ । जसका कारण व्यापारीहरूले बिहान सखारै नै सडकमा आफ्नो ब्यवसाय गर्ने गर्दछन् ।
फोटो: शंकर भुजेल/ नेपाल फोटो सर्भिस
