काठमाडाैँ । स्याङ्जामा खोलाले बगाएर बेपत्ता भएका एक युवक मृत अवस्थामा फेला परेका छन्।
जिल्ला प्रहरी कार्यालय स्याङ्जाका अनुसार २०८३ साल साउन २८ गते राति करिब १०ः२० बजे पुतलीबजार नगरपालिका–१ स्थित अरौदीखोलाले पुतलीबजार नगरपालिका–३ बाडखोला बस्ने २१ वर्षीय सलिम मगरलाई ग ११ प ८१८३ नम्बरको मोटरसाइकलसहित बगाएको थियो।
घटनापछि सिंहसार्दुल गुल्म स्याङ्जा, जिल्ला प्रहरी कार्यालय स्याङ्जा तथा सशस्त्र प्रहरी बल नेपाल ३० नं. गुल्म वालिङबाट खटिएको टोलीले खोजतलास गरेको थियो।
खोजीका क्रममा मगरलाई साउन २९ गते दिउँसो ३ः१० बजे पुतलीबजार नगरपालिका–१३ गैरीजागरस्थित आँधीखोलामा मृत अवस्थामा फेला पारिएको प्रहरीले जनाएको छ।
प्रहरी टोलीले शव खोलाबाट बाहिर निकाली घटनास्थल मुचुल्का गरी पोस्टमार्टमका लागि जिल्ला अस्पताल स्याङ्जा पठाएको छ। घटनाबारे थप अनुसन्धान भइरहेको प्रहरीले जनाएको छ।
