काठमाडौं । राष्ट्रिय प्रजातन्त्र पार्टी (राप्रपा)ले बागमती प्रदेशमा नयाँ सरकार गठनको प्रयासमा सहभागी नहुने निर्णय गरेको छ। प्रदेशको बदलिँदो राजनीतिक समीकरणबीच राप्रपाले सत्ता गठनको अंकगणितमा आफू नजोडिने स्पष्ट गरेको हो।
राप्रपा बागमती प्रदेश संसदीय दलको बैठकले वर्तमान परिस्थितिमा सरकार निर्माणका लागि भइरहेको राजनीतिक जोडघटाउमा संलग्न नहुने निष्कर्ष निकालेको हो। संसदीय दलका नेता उद्धव थापाको अध्यक्षतामा बसेको बैठकले पार्टीको केन्द्रीय कार्यसम्पादन समितिको निर्णय तथा निर्देशनअनुसार प्रदेश सरकारमा सहभागी नहुने प्रस्ताव सर्वसम्मत रूपमा अनुमोदन गरेको जनाएको छ।
प्रदेश सरकारको नेतृत्व परिवर्तनको चर्चा चलिरहेका बेला राप्रपाको यो निर्णयले नयाँ सरकार गठनको समीकरण थप जटिल बनेको छ। यसअघि नेकपा (एमाले)ले कांग्रेस नेतृत्वको सरकारलाई दिएको समर्थन फिर्ता लिएपछि नयाँ सत्ता समीकरणको प्रयास तीव्र भएको थियो। एमाले र नेपाल कम्युनिस्ट पार्टीबीच सरकार गठनका लागि नेतृत्व बाँडफाँटको सहमति भए पनि आवश्यक बहुमत जुट्न सकेको छैन।
बागमती प्रदेशमा सरकार गठनका लागि ५३ सांसदको समर्थन आवश्यक पर्छ। एमाले र नेपाल कम्युनिस्ट पार्टीका सांसद संख्या जोड्दा बहुमत नपुग्ने अवस्था रहेकाले अन्य दलको समर्थन अपरिहार्य देखिएको छ। तर १२ सांसद रहेको राप्रपाले नै सरकार गठनको प्रक्रियामा सहभागी नहुने निर्णय गरेपछि अब सत्ता गठबन्धनका लागि साना दल वा स्वतन्त्र सांसदहरूको समर्थन निर्णायक बन्ने देखिएको छ।
