काठमाडौं । नेपाली काँग्रेसका नेता एवं राष्ट्रिय सभा सदस्य रञ्जित कर्णले काँग्रेस कमजोर वा विभाजित हुँदा देशले राजनीतिक र आर्थिक रूपमा ठूलो क्षति व्यहोर्नुपरेको बताउनुभएको छ ।
आइतबार काठमाडौंमा ‘देश र काँग्रेस जोड्ने अभियान’ले आयोजना गरेको पत्रकार सम्मेलनमा बोल्दै नेता कर्णले इतिहासले समेत यसलाई पुष्टि गरेको भन्दै काँग्रेसको आन्तरिक सुदृढीकरण आवश्यक रहेको बताउनुभयो ।
उहाँले सुनसरीको देवानगञ्जमा हालै भएको घटनाप्रति सरकार र प्रशासनको कार्यशैलीप्रति आपत्ति जनाउनुभयो । उक्त क्षेत्रमा लामो समयदेखि समस्या देखिए पनि जिल्ला प्रशासन, प्रहरी प्रशासन र गृह मन्त्रालयले समयमै गम्भीरता नदेखाउँदा अप्रिय घटना भएको उहाँको भनाइ थियो ।
झन्डै दुई तिहाइ समर्थन प्राप्त वर्तमान सरकारबाट जनताले ठूलो अपेक्षा राखेको भए पनि सरकारले जनतामाथि गोली चलाउनु विडम्बनापूर्ण भएको नेता कर्णले बताउनुभयो । प्रधानमन्त्रीले समयमै संसद् र जनतासँग संवाद गरेको भए प्रशासनले पनि जनतासँग संवाद गरी समस्या समाधान गर्न सक्ने उहाँको भनाइ थियो ।
धार्मिक सहिष्णुता कायम राख्दै वर्तमान समस्याको तत्काल समाधान खोज्नुपर्नेमा जोड दिँदै नेता कर्णले अहिलेको परिस्थितिलाई राजनीतिकरण नगरी सबै नेपाली एकजुट भएर देश जोगाउन लाग्नुपर्ने बताउनुभयो ।
उहाँले भन्नुभयो, ‘जब–जब काँग्रेस कुनै कारणले, चाहे आन्तरिक गुटबन्दीका कारण होस् वा वैचारिक मतभेदका कारण, कमजोर भयो वा विभाजित भयो, तब–तब देशले राजनीतिक र आर्थिक रूपमा ठूलो दुर्घटना व्यहोरेको छ ।’
नेता कर्णले विगतमा काँग्रेसबाट केही कमजोरी र गल्ती भएको भए त्यसबाट पाठ सिकेर अब पार्टी सुध्रिनुपर्ने र बदलिनुपर्ने बताउनुभयो । देशलाई अगाडि बढाउन युवाहरूको काँधमा ठूलो जिम्मेवारी रहेको उल्लेख गर्दै उहाँले पार्टीभित्रको एकता र सुदृढीकरण आवश्यक रहेकोमा जोड दिनुभयो ।
‘हामी नेपाली काँग्रेसका जिम्मेवार साथीहरू हौँ । अहिले हामी यो विषयलाई राजनीतिकरण गर्न चाहँदैनौँ । सम्पूर्ण नेपाली एक ठाउँमा उभिनुपर्छ । देश जोगाउनुपर्छ, देशलाई अगाडि बढाउनुपर्छ,’ उहाँले भन्नुभयो ।
