काठमाडौँ। ग्रीसमा शुक्रवार चलेको तिब्र हावाहुरीका कारण मुलुकभर डढेलोको प्रकोप बढेको छ ।
हावाको गतिका कारण आगो अनियन्त्रित रूपमा फैलिएपछि सयौँ मानिसहरूलाई समुन्द्री मार्गबाट सुरक्षित स्थानमा स्थानान्तरण गरिएको छ भने अग्नि नियन्त्रकहरू ७० भन्दा बढी स्थानमा लागेको डढेलो निभाउन प्रयासरत छन् ।
ग्रीस फायर सर्भिसका प्रवक्ता भासिलिस भार्थाकोगियानिसकाअनुसार हाल सुरक्षाकर्मीहरू देशभरका ७३ स्थानमा लागेका डढेलो नियन्त्रण गर्न लागिपरेका छन् । सबैभन्दा गम्भीर अवस्था मध्य ग्रीसको बोयोटिया क्षेत्रीय इकाई अन्तर्गत पर्ने जिरोनोमी गाउँ नजिक देखिएको छ ।
त्यहाँको आगलागी तटीय बस्ती एगियोस भासिलियोसतर्फ फैलिएपछि सडक मार्ग पूर्ण रूपमा अवरुद्ध भएको थियो । सडक सञ्जाल विच्छेद भएपछि ग्रीक राष्ट्रिय प्रसारक इआरटीकाअनुसार २५४ जना स्थानीय बासिन्दा र पर्यटकहरूलाई समुन्द्री मार्गबाट उद्धार गरिएको छ ।
हेलेनिक नेशनल मेटियोरोलोजिकल सर्भिसकाअनुसार केही क्षेत्रमा हावाको गति १५० किलोमिटर प्रतिघण्टासम्म पुगेको छ, जसलाई ब्युफोर्ट स्केलमा फोर्स ९ मानिन्छ । फायर सर्भिसका अधिकारीहरूले तिब्र हावा र दुर्गम भौगोलिक बनावटका कारण बोयोटिया लगायतका क्षेत्रमा डढेलो नियन्त्रण कार्य निकै चुनौतीपूर्ण बनेको बताएका छन् ।
डढेलो र हावाहुरीका कारण यातायात सेवा समेत प्रभावित भएको छ । राफिना (च्बाष्लब) र लाप्रियो बन्दरगाहबाट एजियन टापुहरूका लागि सञ्चालन हुने फेरि सेवाहरू स्थगित गरिएका छन् ।
यसैगरी, पश्चिम एथेन्सको पोइकिलो पहाडमा भीषण डढेलो फैलिएपछि अधिकारीहरूले मुख्य सडकका केही खण्डहरू बन्द गरेका छन् ।सिन्ह्वाको/न्युज एजेन्सी नेपाल
